Kalekcyju aŭtentyčnych strojaŭ Voli Dziemki pakažuć na Metropolitan Fashion Week u Łos-Andželesie
Śpiavačka, kinavytvorca i pradziusarka Vola Dziemka, jakaja žyvie ŭ Sietle (ZŠA), rupliva źbiraje i restaŭruje aŭtentyčnyja biełaruskija stroi, a ź niadaŭniaha času Vola źbiraje jašče i ŭkrainskija aŭtentyčnyja stroi. Ukrainskaja častka kalekcyi etničnych kaściumaŭ VOLYA budzie pakazanaja na Metropolitan Fashion Week u Sietle 24 vieraśnia, a 1 kastryčnika — u Łos-Andželesie. Navinoj padzialiłasia sama Dziemka na ŭłasnaj staroncy ŭ fejsbuku.
Sioleta mierapryjemstvy ŭ miežach Metropolitan Fashion Week ładziacca ŭ padtrymku niekamiercyjnaj arhanizacyi YOU ARE THE ANGEL, jakaja zajmajecca zabiaśpiečeńniem charčavańnia, miedykamientaŭ i psichasacyjalnaj padtrymki achviaram vajny va Ukrainie.
Ciapier Dziemka šukaje madelaŭ dla ŭdziełu ŭ pakazie.
«Nam treba budzie samastojna padrychtavać častku šou ŭ Sietle (kaściumy zanadta składanyja, kab mianiać ich pamiž demanstracyjami), tamu zaraz my šukajem cudoŭnych madelaŭ (5'8″-5'11″), jakija zachočuć prademanstravać našy aŭtentyčnyja ŭkrainskija stroi XIX stahodździa i dapamahčy nam dapamahčy ludziam, jakija majuć u hetym patrebu, 24 vieraśnia 2022 hoda,» — napisała Vola.
METROPOLITAN FASHION WEEK — adzin z samych pierśpiektyŭnych tydniaŭ mody ŭ Złučanych Štatach z pakazami ŭ Sietle, Łos-Andželesie, Łas-Viehasie, Pałm-Sprynhs i nieŭzabavie ŭ Ńju-Jorku i Majami. Asablivaść Metropolitan Fashion Week u tym, što pakazy prachodziać u nietradycyjnych miescach, dzie demanstrujucca nie tolki madeljery i dyzajniery kaściumaŭ, ale i samyja pryhožyja miescy, jakimi moža pryvabić kožny horad. Metropolitan Fashion Week pradstavić bolš za 750 tvoraŭ mastactva, stvoranych mižnarodnymi dyzajnierami mody i kaściumaŭ, jakija źjaŭlajucca aryhinalnymi i «adzinymi ŭ svaim rodzie».
Sioleta Metropolitan Fashion Week śviatkuje svajo dziesiacihodździe.
Vola Dziemka i jaje falkłorny hurt VOLYA stvaryli najbujniejšuju kalekcyju biełaruskich strojaŭ u śviecie pa-za miežami Biełarusi. Na padstavie hetaj kalekcyi niadaŭna byŭ vydadzieny albom, u jakim pradstaŭlena biełaruskaje śviatočnaje adzieńnie kanca XIX — pačatku XX stahodździa pa rehijonach.
Voś tut možna virtualna pahartać albom biełaruskich strojaŭ i zamović jaho ŭ papiarovym ci elektronnym farmacie, a tut — padtrymać samu Volu.
Čytajcie taksama:
«Navat 300 krupinačak — lepš, čym nul». Jak biełaruska z ZŠA źbiraje i zachoŭvaje tradycyjnyja narodnyja stroi
Biełaruska ź Sietła vydała novy katałoh biełaruskich tradycyjnych strojaŭ. Pahladzicie na hetu pryhažość
«Niehlubskuju kašulu vykupiła na eBay». Pahladzicie, jakuju nievierahodnuju kalekcyju narodnych strojaŭ sabrała biełaruska ŭ Sietle
Pavietranaja himnastka pakazała zakuliśsie pracy ŭ Biełdziaržcyrku7
Kamientary