Chočacie vyraścić doma raślinu, ale vy dalokija ad hetaha? Vam dapamohuć sukulenty

Padbiarycie pravilnuju raślinu

Jość tysiačy vidaŭ sukulentaŭ, ale nie ŭsie jany dobra pryžyvajucca ŭ pamiaškańni. U dadatak, jość takija sukulenty, jakija lepš za astatnija padychodziać dla pačatkoŭcaŭ, piša Wall Street Journal.

Kali chočacie raślinu, jakuju prosta dahladać, pasprabujcie sukulenty rodu chavortyja (Haworthia) i, ŭ pryvatnaści, vid Haworthia attenuata. Raśliny hetaha rodu jašče i marozaŭstojlivyja.

Sansievijeryja trochpałosnaja (Sansevieria trifasciata) — heta jašče adna raślina, jakaja vam šmat što daruje i jakuju ciažka źniščyć. Kali vy žadajecie niešta bolš kampaktnaje, šukajcie vid Sansievijeryja cylindryčnaja (Sansevieria cylindrica).

Padbiarycie pravilny vazon

Dla sukulenta vam dakładna spatrebicca vazon z drenažnaj adtulinaj u im, praź jakuju budzie sychodzić lišniaja vada. Sukulenty lepiej rastuć u niehłybokich vazonach, bo ŭ ich vada nie tak mocna skoplivajecca. Kali vy ŭsio-taki vybirajecie hłybokija vazony, starajciesia nie pieralivać u ich vadu, padtrymlivajcie nievialikuju hłybiniu hleby i vybirajcie raśliny, jakija nie pakutujuć, kali ich mocna palivać. Vam padyduć chavortyja, taŭścianka i rypsalis.

Zamianicie hlebu

Sukulenty časam pradajuć u hlebie, bahataj torfam. Jana dobra padychodzić da hadavalnika, ale nie nadta spryjaje rostu raślin u pamiaškańni ci pry doŭhaterminovym vyroščvańni. Kaktusy i sukulenty raźvivalisia jak vidy ŭ hlebie, bahataj minierałami, i ŭ tarfianoj hlebie zanadta šmat arhaničnych rečyvaŭ dla takich raślin. Tamu pry mahčymaści zamianicie hlebu ŭ vazonie na śpiecyjalny hrunt dla sukulentaŭ.

Kali vy tolki nabyli sukulent, nie śpiašajciesia vykarystoŭvać uhnajeńnie. Pačynajcie ŭnosić jaho ŭ hlebu niedzie praz hod i rabicie heta raz ci dva na hod.

Niachaj budzie śviatło

Usim sukulentam patrebnaje śviatło. Lepš za ŭsio dla ich padychodziać miescy la voknaŭ na ŭschod, poŭdzień ci zachad, i nie sumniavajciesia — vašamu sukulentu treba miesca jak maha bližej da sonca. Kali raślina nachilajecca, a nie raście viertykalna, heta jakraz moža być prykmietaj taho, što joj treba bolš sonca.

Nie palivajcie sukulenty zanadta šmat

Rekamiendujuć palivać hetyja raśliny raz u prykładna dva-try tydni, pry hetym davajcie hlebie vysachnuć pamiž palivami. Kab pravieryć, ci suchaja hleba, prasuńcie ŭ jaje palec na paru santymietraŭ. Kali ŭnizie hleba jašče vilhotnaja, pačakajcie z palivam.

Taksama vy možacie sačyć za liściem: kali jano robicca trochi žoŭtym i napaŭprazrystym, heta moža śviedčyć pra praźmierny paliŭ. U takim vypadku spynicie paliŭ i źlicie lišniuju vadu z vazona — tady, mahčyma, vy zdolejecie likvidavać naniesienuju škodu. Ale kali vy ŭžo bačycie na ściable ci na liści raśliny ciomnyja plamy abo kali ściabło robicca miakkim, raślinu, napeŭna, užo nie vyratavać.

Ale i nie davajcie sukulentam vysachnuć

Kali liście pačynaje morščycca, a hleba ściskajecca i ŭ joj źjaŭlajucca raskoliny, značyć, vy vielmi mała palivajecie vašu raślinu. U takim vypadku pahruzicie vazon z raślinaj u misku z vadoj i trymajcie jaho tam, pakul hleba ŭ vierchniaj častcy vazona nie stanie vilhotnaj, u ideale nie mienš čym na 30 chvilin. Potym dastańcie vazon z vady i dajcie hlebie vysachnuć pierad nastupnym palivam.

Ekśpierty rekamiendujuć palivać mienavita hlebu, a nie sam sukulent, bo hetyja raśliny lepš rastuć, kali ich hleba pramakaje, a potym vysychaje pierad nastupnym palivam. Jość pamyłkovaja dumka, što sukulenty varta palivać z pulvieryzatara, ale nasamreč lepiej vykarystoŭvać butelku.

Raim dobry sposab palivu raślin — jon padydzie na čas śpioki i adjezdu

Zaviažycie ŭ sadzie žoŭtuju stužku. Heta dapamoža vam pazbavicca ad surjoznaj prablemy

• 8
• 0
• 1
• 0
• 0
• 0
• 1
• 0