Ukrainski jepiskap — patryjarchu Kiryłu: Vy adkažacie pierad Boham za kožnuju ślazinku matčynu, za kožnuju śviežuju mahiłku
Jepiskap Ukrainskaj pravasłaŭnaj carkvy Maskoŭskaha patryjarchatu mitrapalit Łonhin žorstka raskrytykavaŭ patryjarcha Kiryła za padtrymku vajny.
Padčas niadzielnaj propaviedzi 6 červienia jon skazaŭ, źviartajučysia da Kiryła: «Dziakujem, Vaša Śviataść, za vialikaje vaša błasłaŭleńnie na krovapralićcie. Heta biazbožža! Nam vielmi baluča, braty i siostry. Treba stajać na kaleniach i prasić spynić krovapralićcie, a nie błasłaŭlać na vajnu. Chtości budzie adkazvać za hetuju kroŭ pralituju, za matčyny ślozy, za dziaciej, jakija zastalisia sirotami. Vy budziecie adkazvać, tyja, chto błasłaŭlaje vajnu.
Vy adkažacie pierad Boham za kožnuju ślazinku matčynu, za kožnuju śviežuju mahiłku.
Heta tak nie darujecca, Vy paranili ŭvieś ukrainski narod i pravasłaŭny śviet. Vy prynieśli nam vialiki bol. Nie šukajcie sabie apraŭdańnia».
(…) Božaha vam błasłaŭleńnia, braty i siostry: nie zabyvajcie, našy dzieci pamirajuć, my kožny dzień chavajem našych synoŭ i dziaciej. Poŭna ŭdoŭ, sirot, ślozy i matčyny ślozy. Da čaho my dajšli? Vy ničoha nie adčuvajecie? Vaša duša nie balić? My nie možam spać pa načach. (…) Vy pakinuli ludziej biez prytułku, biez doma, biez chleba, biez vady, vy pakinuli dziaciej płakać pa darohach, čužymi sirotkami. Nie balić duša? Sumleńnie nie mučyć, vaša Śviaciejšastva? Vy błasłavili vajnu, za hetuju kroŭ pryjdziecca adkazvać. I za našu čyściniu pravasłaŭnaj viery taksama pryjdziecca adkazvać».
Mitrapalit Łonhin — značny dziejač UPC MP, jaki atrymaŭ zvańnie Hieroja Ukrainy za pracu pa sacyjalnaj abaronie dziaciej-sirot.
Patryjarch Kirył nie asudžaŭ rasijskaje ŭvarvańnie va Ukrainu. Padčas propaviedziaŭ u sakaviku jon kazaŭ, što «vosiem hadoŭ iduć sproby źniščyć toje, što isnuje na Danbasie». I što Danbas u biadzie mienavita tamu, što tam «idzie nieprymańnie tak zvanych kaštoŭnaściaŭ, jakija siońnia prapanujucca tymi, chto pretenduje na suśvietnuju ŭładu», nahadvaje «Bi-bi-si».
Taksama Kirył pieradaŭ kiraŭniku Rashvardyi Zołatavu abraz, kab jon «natchniŭ maładych voinaŭ, jakija prymajuć prysiahu».
Pradstaŭniki UPC krytykavali Kiryła i raniej. U kancy maja ŭdzielniki saboru UPC pryniali zajavu z asudžeńniem vajny, jakuju Rasija viadzie suprać Ukrainy, vykazali niazhodu z pazicyjaj maskoŭskaha patryjarcha Kiryła i ŭnieśli źmieny ŭ svoj statut, jakija zamacoŭvajuć jaje «poŭnuju samastojnaść i niezaležnaść», nahadvaje «Bi-bi-si».
Ciapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi47
Kamientary