U ES płanujuć palehčyć kanfiskacyju majomaści, zdabytaj złačynnym šlacham. Heta kranie rasijan i biełarusaŭ
Zakonaprajekt, jaki prapanuje Jeŭrakamisija, maje na mecie dazvolić adbirać złačynna nažytyja srodki biez abvinavaŭčaha prysudu suda. Novyja miery płanujuć raspaŭsiudzić taksama na rasijskich i biełaruskich biznesmienaŭ, paviedamiŭ namieśnik staršyni Jeŭrakamisii Marharycis Schinas u intervju štotydnioviku Welt am Sonntag.
Jeŭrakamisija ŭ metach baraćby suprać arhanizavanaj złačynnaści maje namier prapanavać papraŭki ŭ zakanadaŭstva, jakija sprościać kanfiskacyju majomaści, nažytaj złačynnym šlacham. Novyja miery płanujecca raspaŭsiudzić taksama na rasijskich i biełaruskich biznesmienaŭ i palitykaŭ, źviazanych z vajnoj Rasii va Ukrainie.
«Jeŭrakamisija ŭ najbližejšy čas vykaža prapanovu ab udaskanaleńni dziejučych pravavych ramak ES, jakija tyčacca kanfiskacyi majomaści, kab uzmacnić paŭnamoctvy nacyjanalnych orhanaŭ pravaparadku pa vyjaŭleńni, zamarozcy i kanfiskacyi majomaści, jakaja nažytaja złačynnym šlacham, i kiravańnie joj», — skazaŭ Marharycis Schinas, adznačyŭšy, što dziejučych zakonaŭ niedastatkova, kab pazbavić arhanizavanuju złačynnaść vysokich prybytkaŭ.
Pa słovach Schinasa, abjom złačynnych dachodaŭ u ES składaje nie mienš za 139 miljardaŭ jeŭra, ale z hetaj sumy ŭdajecca kanfiskavać tolki adzin pracent.
Raspracavanyja Jeŭrakamisijaj papraŭki dazvolać kanfiskavać złačynnyja srodki i kiravać imi biez abvinavaŭčaha prysudu suda, adznačyŭ Schinas.
Jon taksama paviedamiŭ, što novyja praviły dapamohuć Jeŭrakamisii bolš efiektyŭna vykonvać sankcyi suprać aliharchaŭ i blizkich da Pucina palitykaŭ.
«Vielmi kankretny prykład taho, nakolki važnaja zamarozka i kanfiskacyja majomaści, my bačym u suviazi z sankcyjami ES suprać rasijan i biełarusaŭ, jakija spryjali vajnie va Ukrainie», — skazaŭ Schinas.
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im13
Kamientary