«My pryjšli pa svajo, Rasija — moc». Jak žychary rasijskaha Rubcoŭska reahujuć na fakt maradziorstva ziemlakoŭ
Dziakujučy zapisam z anłajn-kamiery kurjerskaj słužby SDEK u Mazyry, uvieś śviet daviedaŭsia pra ruskich sałdat-maradzioraŭ, jakija nie curajucca adpraŭlać dadomu narabavanaje va ŭkraincaŭ padčas vajny tonami.
Paźniej asabistyja źviestki sałdat, zaśviečanych 2-ha krasavika, apublikavaŭ prajekt «Biełaruski Hajun».
Asnoŭnaja ich masa, jak vyjaviłasia, pachodzić z horada Rubcoŭsk, što ŭ Ałtajskim krai. U hety punkt «palacieli» muzyčnyja instrumienty, kałonki, stoł, namiot, elektrasamakat, televizary, adzieńnie, akumulatary, zapčastki i mnohaje inšaje. Tolki adzin Jaŭhien Kavalenka, jak paviedamlajecca, pierapraviŭ na radzimu 450 (!) kiłahramaŭ nakradzienaha.
Reakcyja suśvietnaj supolnaści na takija pavodziny była kateharyčnaj: asudžeńnie i krytyka. A što pra heta ŭsio kažuć u rodnym horadzie maradzioraŭ? Pahladzieli, što pišuć miascovyja pabliki i žychary.
Rubcoŭsk: čatyry kałonii na horad, zaniapad paśla razvału SSSR
Rubcoŭsk — rasijski horad z nasielnictvam krychu mienš za 140 tysiač čałaviek (ź ich 95,8% — ruskija, kala 0,8% — ukraincy). Znachodzicca za 40 kiłamietraŭ ad miažy z Kazachstanam. Da raspadu SSSR ličyŭsia bujnym mašynabudaŭničym centram: hetamu šmat u čym paspryjała toje, što padčas Vialikaj Ajčynnaj vajny siudy evakujavalisia vytvorčaści ź inšych častak SSSR, pierš-napierš z terytoryi siońniašniaj Ukrainy — Adeski zavod sielskahaspadarčaha mašynabudavańnia i Charkaŭski traktarny zavod. Ale paśla raspadu SSSR usie ekanamičnyja i sacyjalnyja pakazčyki stali imkliva padać. Standartnymi dla horada navinami stali pahrozy haładoŭkaj ad pracaŭnikoŭ, drennyja darohi, zatrymki zarobkaŭ.
U «Vikipiedyi» da viadomych vychadcaŭ z Rubcoŭska dadali sałdat-maradzioraŭ
Akramia pramysłovaj historyi, horad viadomy tym, što siońnia na płoščy 84 kvadratnyja kiłamietry (pryblizna jak biełaruskija Baranavičy) raźmiaščajucca adrazu čatyry kałonii.
«Nie atrymajecca ŭ ich ačarnić Rasiju»
Niahledziačy na šyroki rezanans, jaki atrymała tema z maradziorstvam, hety incydent miascovymi pablikami Rubcoŭska ihnarujecca, a kamienty z krytykaj rasijskich sałdat padčyščajucca. Tych, chto pościć takuju infarmacyju, imknucca zabłakavać. Adminy tłumačać heta tym, što heta pravakacyjny kantent, jaki nijak nie tyčycca haradskoj tematyki.
U kamientach da niekatorych pastoŭ možna ŭbačyć, što i videa pra ziemlakoŭ-maradzioraŭ ruskija tradycyjna nazyvajuć «fejkam z Ukrainy», «pastanoŭkaj».
Kali fakt nie asprečvajuć, vykazvajuć padtrymku ziemlakam, apraŭdvajučy ŭsio tym, što ŭkraincy nibyta zasłužyli.
Usie spasyłki na trochhadzinnaje videa, jak rasijskija sałdaty-maradziory z Mazyra adpraŭlajuć dadomu nakradzienaje va Ukrainie, apieratyŭna vydalajucca.
«Naša Niva» adnaŭlaje zbor danataŭ — padtrymać prosta
Čytajcie jašče:
Homielskija taksisty: Ruskija šukajuć, chto b davioz dabro da Pskoŭskaj vobłaści, dajuć 200 dalaraŭ
Ciapier čytajuć
U Varšavu pryjechała sotnia biełaruskich palitviaźniaŭ13
Kamientary