Ci pojduć tanki na śmietnik historyi? Mahčymaje nastupstva ŭkrainskaj vajny

Za čas z pačatku vajny Rasija straciła, pa ŭkrainskich danych, nie mienš za 582 tanki. Vajenny resurs Oryx pryvodzić bolš ścipłyja, ale ŭsio roŭna vialikija ličby — nie mienš za 279 tankaŭ. Možna kazać pra toje, što Maskva straciła nie mienš za 10 pracentaŭ svaich tankaŭ, piša Business Insider.

Ukrainskaja abarona akazałasia nastolki efiektyŭnaj, što šmatlikija ekśpierty prypisvajuć vinu ŭ parazie rasijskaha nastupu nie tolki samim kamandujučym, ale i ŭvohule idei vykarystoŭvać tanki ŭ bai. Usio bolš dokazaŭ taho, što z punktu hledžańnia taktyki tanki majuć šmat niedachopaŭ. Tamu, mahčyma, hetaja zbroja chutka apyniecca razam z kalaśnicami dy kavaleryjaj na śmietnicy vajennaj historyi.

Tanki vykarystoŭvajuć u naziemnaj vajnie bolš čym 80 hadoŭ. Ich zadača — praryvacca praz pazicyi voraha, kab paźniej piachota zajšła na zavajavanyja terytoryi i ŭtrymała ich. Suprać tankaŭ daŭno prymianiajuć pieranasnuju zbroju nakštałt bazuk i hranatamiotaŭ, a taksama impravizavanuju vybuchovuju zbroju — uspomnicie chacia b supraćtankavyja lipučyja bomby ź filma «Vyratavać radavoha Rajana».

Ale, kali pahladzieć na nieefiektyŭnaść tankavaha nastupu va Ukrainie, možna pabačyć, što prahres u technałohijach zbroi robić tanki nie takimi ŭžo nadziejnymi i, mahčyma, navat u niečym sastarełaj źjavaj. Tannyja drony, jakija nizka latajuć, zdolnyja atakavać tanki źvierchu. Piachota, u svaju čarhu, abstrelvaje tanki sa zbroi novaha pakaleńnia, jakaja robić ich źniščeńnie vielmi prostym.

Ručnaja zbroja, pra jakuju idzie havorka, źmianiaje padychod da vajennych dziejańniaŭ. Patrebna minimalnaja padrychtoŭka, i sałdat, u tym liku i dobraachvotnik, užo moža źniščać ź jaje dapamohaj tanki. Pieranasny rakietny kompleks Javelin, naprykład, dazvalaje atakavać tank z samaha niebiaśpiečnaha dla jaho kirunku — źvierchu. Supraćtankavaja pieranasnaja rakieta NLAW takaja ž prostaja va ŭžyvańni, jak Javelin.

Hetyja varyjanty zbroi pracujuć pa pryncypu «vystraliŭ i zabyŭ», kali paśla pusku zbroi apierataru nie treba jaje kantralavać. I va ŭkrainskaj armii reziervistaŭ vučać pracavać z hetaj zbrojaj z samaha pačatku vajny.

Šmat zachodnich analitykaŭ ličać, što Rasija naŭrad ci zdolnaja pravodzić jakasnyja vajennyja apieracyi z udziełam roznych rodaŭ vojsk — naprykład, kab avijacyja i artyleryja dziejničali razam i prykryvali tankavy nastup. Va Ukrainie rasijskija tanki išli napieradzie piachoty, jakaja mahła b u inšym vypadku ich abaranić. Šmat jakija tanki adjazdžali daloka ad mašyn z palivam, inšyja zastavalisia prosta na vulicach i nijak nie chavalisia.

Tamu, mahčyma, paraza rasijskaha tankavaha nastupu źviazanaja vyklučna z drennaj stratehijaj. Tamu amierykanski padychod da naziemnych apieracyj, kali tanki znachodziacca ŭ siaredzinie nastupa, naŭrad ci źmienicca ŭ chutkim časie.

«Naša Niva» adnaŭlaje zbor danataŭ — padtrymać prosta

Čytajcie jašče:

«Dzieciam niama kudy viarnucca. Jany pra heta jašče nie viedajuć». Ukrainski śpiavak napisaŭ kranalny post pra źniščany ŭ vajnie dom, jaki byŭ dla jaho ŭsim

• 13
• 0
• 1
• 3
• 7
• 0
• 0
• 0