Mikrapłastyk upieršyniu znajšli ŭ kryvi čałavieka. Ci jość niebiaśpieka?
Navukoŭcy znajšli ŭ kryvi ludziej čaścicy PET, polietylenu i polistyrołu. Pryčym navukoŭcy vyjavili drabniutkija čaścicy amal u 80% pratestavanych ludziej. Adkryćcio pakazvaje, što čaścicy mohuć pieramiaščacca pa ciele i asiadać u orhanach. Upłyŭ na zdaroŭje pakul nieviadomy.
Navukovy artykuł vyjšaŭ u časopisie Environment International, koratka pra jaje raspaviadaje Guardian.
Vielizarnaja kolkaść płastykavych adchodaŭ vykidajecca ŭ navakolle. Ciapier mikrapłastyk zabrudžvaje ŭsiu płanietu, ad viaršyni hary Evierest da samych hłybokich akijanaŭ. Ludzi spažyvajuć drabniutkija čaścicy ź ježaj i vadoj, a taksama ŭdychajuć ich. Mikrapłastyk byŭ znojdzieny ŭ fiekalijach niemaŭlataŭ i darosłych. Čaścicy taksama znachodzili ŭ płacentach ciažarnych žančyn, a ŭ ciažarnych pacukoŭ jany chutka prachodziać praź lohkija ŭ serca, mozh i inšyja orhany płoda.
U novym daśledavańni navukoŭcy praanalizavali ŭzory kryvi 22 zdarovych darosłych ludziej i vyjavili čaścicy płastyka ŭ 17 ź ich.
Pałova ŭzoraŭ kryvi ŭtrymlivała PET-płastyk, jaki zvyčajna vykarystoŭvajecca ŭ butelkach dla napojaŭ, a tracina — polistyroł, jaki vykarystoŭvajecca dla ŭpakoŭki. Čverć ŭtrymoŭvała polietylen, ź jakoha vyrablajuć płastykavyja pakiety.
«Viadoma, jość padstavy dla chvalavańnia. Čaścicy mikrapłastyka pieranoscca kryvioju pa ŭsim ciele», — skazaŭ prafiesar Dzik Vietchaak, ekataksikołah z Amsterdamskaha svabodnaha ŭniviersiteta ŭ Niderłandach.
Pavodle jaho słoŭ, papiaredniaja praca pakazała, što kolkaść mikrapłastyka ŭ fiekalijach niemaŭlataŭ u dziesiać razoŭ vyšejšaja, čym u darosłych, i što dzieci, jakich kormiać z płastykavych butelek, prahłynajuć miljony čaścic mikrapłastyka ŭ dzień.
«Heta navatarskaje daśledavańnie. Ciapier patrabujecca dadatkovaja praca. Adroźnieńnie moža adlustroŭvać karotkačasovaje ŭździejańnie da taho, jak byli ŭziatyja ŭzory kryvi, — naprykład, pićcio z kubka z płastykam abo našeńnie płastykavaj maski dla tvaru. Vialikaje pytańnie ŭ tym, što adbyvajecca ŭ našym ciele. Čaścicy zatrymlivajucca ŭ arhaniźmie? Pieranosiacca jany ŭ peŭnyja orhany? I ci dastatkova vysokija hetyja ŭzroŭni, kab vyklikać zachvorvańnie? Nam terminova treba finansavać dalejšyja daśledavańni, kab my mahli heta vyśvietlić», — skazaŭ navukoviec.
-
Inžynier z Anthropic zvolniŭsia, kab papiaredzić, što ŠI voś-voś moža vyjści z-pad kantrolu
-
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf
-
U Rasii dla Android zrabili niezvyčajnuju kłavijaturu— jana adrazu pakazvaje termin za kamientar, što vy napisali
Ciapier čytajuć
Pasadzili advakata Dźmitryja Łajeŭskaha, jaki abaraniaŭ Babaryku i Znaka8
Pasadzili advakata Dźmitryja Łajeŭskaha, jaki abaraniaŭ Babaryku i Znaka
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5151
Kamientary