Pucin pačaŭ represii suprać 5-j słužby FSB. Jana adkazvała za zbor źviestak pra palityčnuju situacyju va Ukrainie napiaredadni ŭvarvańnia
Paśla dvuch tydniaŭ vajny prezident Rasii Uładzimir Pucin pačaŭ represii suprać svajho lubimaha viedamstva — FSB. Pa źviestkach žurnalistaŭ Andreja Sałdatava i Iryny Barahan, pad udar trapiła tak zvanaja 5-ja słužba FSB. Jaje kiraŭnictva, pa śćviardžeńni krynic Sałdatava i Barahan, adpraŭlena pad chatni aryšt, piša «Mieduza».
5-ja słužba (aficyjnaja nazva — Słužba apieratyŭnaj infarmacyi i mižnarodnych suviaziaŭ) kuryruje suviazi FSB z zamiežnymi partniorami, u tym liku z amierykanskimi viedamstvami. Unutry słužby isnuje sumna viadomy Departamient apieratyŭnaj infarmacyi( DAI), jaki vykonvaje funkcyi źniešniaj raźviedki FSB.
FSB atrymała prava pravodzić apieracyi za miažoj u kancy 1990-ch, kali Uładzimir Pucin byŭ dyrektaram hetaj śpiecsłužby. Tady ž unutry FSB sfarmavali novaje ŭpraŭleńnie, jakomu daručyli pravodzić vyviedvalnyja apieracyi na terytoryi byłoha SSSR.
U 2004 hodzie ŭpraŭleńnie pavysili ŭ statusie, pieratvaryli ŭ paŭnavartasny departamient — Departamient apieratyŭnaj infarmacyi. Nieŭzabavie ŭ jaho źjaviŭsia novy kiraŭnik — Siarhiej Biasieda, jaki raniej słužyŭ u adździele FSB i mieŭ vydatnyja suviazi ŭ Administracyi prezidenta.
Na ŭsioj postsavieckaj prastory asablivaje miesca ŭ pryjarytetach DAI zajmała Ukraina. Dakładna viadoma, što sam Siarhiej Biasieda znachodziŭsia va Ukrainie 20—21 lutaha, padčas revalucyi na Majdanie. Z 2014 hoda Biasieda znachodzicca ŭ sankcyjnych śpisach ZŠA i Jeŭrasajuza, na jaho zaviedzienaja sprava ŭkrainskimi słužbami.
Adnak i nadalej apieratyŭniki źbirali vyviedvalnuju infarmacyju va Ukrainie, vierbavali krynicy i viali padryŭnuju dziejnaść. Mienavita 5-ja słužba adkazvała za pradastaŭleńnie Uładzimiru Pucinu infarmacyi ab palityčnych padziejach va Ukrainie napiaredadni ŭvarvańnia.
I padobna, praz dva tydni vajny da Pucina narešcie dajšło, što jaho paprostu ŭviali ŭ zman:
5-ja słužba, bajučysia razzłavać kiraŭnika, prosta zabiaśpiečvała jaho tym, što jon sam chacieŭ pačuć. Ciapier krynicy paviedamlajuć, što hienierał Biasieda i jahony namieśnik źmieščanyja pad chatni aryšt.
Siarod pryčyn nazyvajuć niametavaje vykarystańnie srodkaŭ, vydzielenych na apieracyi, a taksama drennuju raźviedvalnuju infarmacyju.
Šef amierykanskaj vajskovaj raźviedki: My pamylilisia
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary