Na sustrečy «narmandskaj čaćviorki» chočuć vyznačyć datu pieramovaŭ Ukrainy z «ŁNR» i «DNR»
Siońnia, 26 studzienia, daradcy lidaraŭ krain «narmandskaha farmatu» sustrenucca ŭ Paryžy. Jany mohuć damovicca pra datu pieramovaŭ Ukrainy ź sieparatystami ab statusie Danbasa, paviedamlaje DPA sa spasyłkaj na krynicy ŭ Jelisiejskim pałacy.
Palityčnyja daradcy lidaraŭ «narmandskaj čaćviorki» — Niamieččyny, Francyi, Ukrainy i Rasii pavinny sustrecca ŭ sieradu, 26 studzienia, u Paryžy. Padčas kansultacyj, u pryvatnaści, «chočuć vyznačyć datu, kali Ukraina praviadzie pieramovy ź sieparatystami ab asablivym statusie Danbasa», paviedamlaje ahienctva dpa sa spasyłkaj na krynicy ŭ Jelisiejskim pałacy 25 studzienia.
Pa hety dzień Ukraina aficyjna adchilała lubyja inicyjatyvy pa pieramovach z pradstaŭnikami samaabvieščanych respublik na Danbasie. Kijeŭ bačyć za stałom pieramovaŭ tolki RF jak bok kanfliktu, piša Deutsche Welle.
Taksama, jak adznačaje DPA, padčas pieramovaŭ daradcaŭ ŭ Paryžy havorka pojdzie pra «humanitarnyja miery i mierkavańni adnosna budučyni Ukrainy».
Prezident Francyi Emanuel Makron płanuje 28 studzienia pravieści pieramovy z Uładzimiram Pucinym pa deeskałacyi kanfliktu vakoł Ukrainy. U Jelisiejskim pałacy ličać, što dobrym sihnałam deeskałacyi, u pryvatnaści, staŭ by cisk z boku Rasii na sieparatystaŭ, kab pravieści pieramovy z Kijevam ab statusie Danbasa.
Fakt pieramovaŭ palityčnych daradcaŭ u Paryžy paćvierdziŭ i kiraŭnik Ofisa prezidenta Ukrainy Andrej Jarmak. Pa jaho słovach, na ich havorka pojdzie ab režymie spynieńnia ahniu na Danbasie, a taksama ab kožnym z punktaŭ Minskich pahadnieńniaŭ. Pry hetym Jarmak čakaje, što padčas pieramovaŭ Niamieččyna i Francyja buduć zajmać praaktyŭnuju pazicyju.
7 studzienia Makron razam ź niamieckim bokam inicyjavaŭ novuju sustreču ŭ «narmandskim farmacie».
Da hetaha Rasija admoviłasia ad sustrečy ministraŭ zamiežnych spraŭ u «narmandskim farmacie», jakuju Francyja prapanavała pravieści vosieńniu 2021 hoda ŭ Paryžy. Paśla MZS RF apublikavaŭ dypłamatyčnuju pierapisku pamiž rasijskim, niamieckim i francuzskim ministrami zamiežnych spraŭ. Heta patłumačyli tym, što pazicyja i padychody RF da praviadzieńnia ministerskaj sustrečy ŭ «narmandskim farmacie» nibyta padviarhajucca skažeńniam.
Apošnim razam krainy «narmandskaj čaćviorki» pravodzili sustreču ŭ farmacie videakanfierencyi na ŭzroŭni kiraŭnikoŭ MZS u listapadzie 2020 hoda. Da hetaha lidary dziaržaŭ sustrakalisia ŭ Paryžy ŭ śniežni 2019 hoda paśla trochhadovaha pierapynku.
24 studzienia na pazačarhovym pasiadžeńni Kabiniet ministraŭ Ukrainy adklikaŭ zakonaprajekt «Ab asnovach dziaržaŭnaj palityki pierachodnaha pieryjadu», uchvaleny uradam jašče 4 žniŭnia 2021 hoda. «Takoje rašeńnie źviazana ź nieabchodnaściu jaho hruntoŭnaj dapracoŭki ŭ adpaviednaści z zaklučeńniem Jeŭrapiejskaj kamisii «Za demakratyju praz prava» (Vieniecyjanskaj kamisii) ad 15 kastryčnika 2021 hoda», — tłumačycca na sajcie ŭkrainskaha ŭrada.
Pa słovach vice-premjer-ministra, ministra pa pytańniach reintehracyi časova akupavanych terytoryj Ukrainy Iryny Vieraščuk, akramia šerahu krytyčnych zaŭvah ad Vieniecyjanskaj kamisii, taksama isnuje niedastatkovaja padtrymka biahučaj redakcyi prajekta z boku deputackaha korpusa i śpiecyjalistaŭ.
Havorka idzie pra zakonaprajekt ab dziaržaŭnaj palitycy pierachodnaha pieryjadu na časova akupavanych terytoryjach Danieckaj i Łuhanskaj abłaściej, a taksama Aŭtanomnaj Respubliki Krym i Sievastopala.
David i Halijaf: paraŭnoŭvajem siły rasijskaj i ŭkrainskaj armij
Bajden, Džonsan i lidary krain ES abmierkavali biesprecedentny pakiet sankcyj suprać Rasii
Deputatka, jakaja rychtuje pryhažuń dla Łukašenki, vyjšła zamuž16
Kamientary