Rasijski čynoŭnik paraiŭ ministru infarmacyi Kazachstana nie naviedvać Bajkanur
Pa słovach hiendyrektara «Raskosmasa» Dźmitryja Rahozina, na kasmadromie Askaru Umaravu nie buduć rady. Da hetaha kiraŭnik Rassupracoŭnictva Jaŭhienij Prymakoŭ abvinavaciŭ ministra ŭ rusafobii, spasłaŭšysia na apublikavanyja ŭ 2012 hodzie vykazvańni, paviedamlaje RBK.
Na Bajkanury nie buduć rady vizitu novaha ministra infarmacyi Kazachstana Askara Umarava, jakoha kiraŭnik Rassupracoŭnictva Jaŭhien Prymakoŭ raniej abvinavaciŭ u rusafobii, zajaviŭ hiendyrektar «Raskosmasa» Dźmitryj Rahozin.
«Na kasmadromie Bajkanur my nie budziem rady ministru Askaru Umaravu. My jaho tam nie čakajem», — napisaŭ Rahozin u Tvitary
Prymakoŭ 12 studzienia ŭ dopisie ŭ svaim telehram-kanale nazvaŭ Umarava «rusafobskaj dreńniu». Jon pryvioŭ cytaty, jakija prypisvajucca Umaravu, pra «niezrazumieły Dzień Pieramohi», ruskich-kałanizataraŭ i drenny servis ruskaha biznesu, apublikavanyja na partale «Ruskija ŭ Kazachstanie» ŭ žniŭni 2012 hoda.
Aŭtar materyjału śćviardžaŭ, što Umaraŭ publikavaŭ hetyja vykazvańni ŭ Fejsbuku pad nikam TurkMedia. U toj čas jon byŭ vice-prezidentam ciurkskaj akademii, a da hetaha pracavaŭ u ŚMI. Znajści aryhinał publikacyj u sacsietcy RBK nie ŭdałosia.
Kiraŭnik «Rassupracoŭnictva» dadaŭ, što arhanizacyja nie pracuje z rusafobami, što «całkam praduchilaje luboje <…> uzajemadziejańnie sa zhadanym ministram i uznačalenym im Ministerstvam infarmacyi ŭ ciapierašniaj kanfihuracyi».
U adkaz na abvinavačvańni Prymakova Umaraŭ zajaviŭ ab prychilnaści brackim adnosinam z susiedziami. «Ja nie źjaŭlajusia tym, kim mianie sprabujuć pradstavić. Na ŭsich papiarednich pasadach staraŭsia vieści plonnuju pracu z rasijskimi i inšymi partniorami», - padkreśliŭ ministr, adznačyŭšy, što pavažaje pradstaŭlenuju Rasijaj Kazachstanu padtrymku.
Umaraŭ staŭ ministram infarmacyi 11 studzienia, kali prezident Kazachstana Kasym-Žamart Takajeŭ abviaściŭ skład novaha ŭrada: stary 5 studzienia byŭ adpraŭleny ŭ adstaŭku ŭ suviazi z pratestami. Da hetaha Umaraŭ pracavaŭ u tym ža ministerstvie.
Kamientary