Pastanova №991 admienienaja ŭviečary ŭ aŭtorak. Jašče ŭranku Sidorski apraŭdvaŭ jaje. Adnak udzień da jaje krytykaŭ dałučyŭsia pamočnik prezidenta Siarhiej Tkačoŭ.
Jašče ŭranku 4 žniŭnia premjer-ministr Siarhiej Sidorski apraŭdvaŭ jaje. Jon usiaho tolki «daručyŭ uradu ŭnieści niekatoryja karekciroŭki» ŭ pastanovu №991. A ŭdzień da jaje krytykaŭ dałučyŭsia pamočnik prezidenta Siarhiej Tkačoŭ. I ŭviečary ahienctva BIEŁTA pieradało: «Biełaruski ŭrad pa daručeńni Alaksandra Łukašenki razhledzieŭ situacyju, što skłałasia paśla pryniaćcia pastanovy numar 991 «Ab niekatorych pytańniach nabyćcia tavaraŭ na terytoryi Biełarusi, i siońnia jaje admianiŭ».
Raniej u aŭtorak Alaksandr Łukašenka daručyŭ uradu vypravić niehatyŭnuju situacyju, što skłałasia paśla pryniaćcia pastanovy № 991, paviedamiła pres-słužba prezidenta.
"Paśla viartańnia prezidenta Respubliki Biełaruś z Kyrhyzstana da jaho pastupili šmatlikija skarhi nakont pryniataj uradam pastanovy № 991 "Ab niekatorych pytańniach nabyćcia tavaraŭ na terytoryi Biełarusi". Za rastłumačeńniami hetaha rašeńnia Savieta ministraŭ źviartajucca i ŭ Administracyju kiraŭnika dziaržavy", — adznačajecca ŭ paviedamleńni.
U suviazi z hetym Łukašenka "daručyŭ uradu nieadkładna razabracca i pryniać miery pa vypraŭleńni najaŭnaj niehatyŭnaj situacyi". U vyniku pastanova była admieniena.
"Biełaruski ŭrad apynuŭsia ŭ nie zusim zručnaj situacyi. Jašče ŭčora i siońnia ranicaj nam dakazvali pieravahi dakumienta, ale ŭžo k viečaru jaho admianili. Ciapier biełaruski biźnies moža ŭzdychnuć svabodna", — havorycca ŭ kamientary "Panaramy".
***
Pastanova, jakaja nabyła moc 1 žniŭnia, vyklučała pasrednikaŭ z pracesu realizacyi jurydyčnym asobam tavaraŭ na terytoryi Biełarusi. Z hetaha času jurasoby mieli nabyvać tavary tolki ŭ tych pastaŭščykoŭ, jakija źjaŭlajucca vytvorcami, abo ich aficyjnych handlovych pradstaŭnikoŭ.
Zhodna ź joj, dla ŭklučeńnia ŭ pieralik aficyjnych handlovych pradstaŭnikoŭ musova było padać ekanamičnaje abhruntavańnie nabyćcia tavaraŭ u pastaŭščyka. Choć heta niešta subjektyŭnaje i absurdnaje z punktu hledžańnia rynkavaj łohiki. Čynoŭniki prysvojvali sabie prava vyrašać za pryvatnikaŭ.
Pastanova vyklikała rezkuju krytyku pradstaŭnikoŭ biźniesu, jakija zapatrabavali admieny hetaha dakumienta.«Dajšło da taho, što kamplektujučyja, chimičnyja materyjały, mietałapradukcyju stali zavozić praz pasrednikaŭ», — cytavała kiraŭnika ŭrada ahienctva BIEŁTA.Tym nie mienš, premjer-ministr apraŭdvaŭ ideju.
Padčas manitorynhu zhadanych apieracyj, paviedamiŭ Sidorski, vyśvietliłasia, što roźnica ŭ canie adnaho i taho ž tavaru, jaki realizujecca praz pasrednickija struktury i bieź ich, składaje ad 30 da 260%. «Takoha być nie pavinna», — hrymieŭ premjer. Jon spasłaŭsia na Kamitet dziaržkantrolu, jaki źviartaŭ uvahu ŭrada na hetyja fakty.
Adnačasova kiraŭnik urada padkreśliŭ, što pastanova № 991 datyčyć tolki dziaržpradpryjemstvaŭ i AAT z dolaj dziaržavy ŭ statutnym fondzie. Heta radykalna razychodziłasia z tekstam dakumienta. Sidorski faktyčna daŭ pieršy zadni chod.
Usio rezka źmianiłasia ŭdzień. Hołas suprać pastanovy padaŭ vyklučna ŭpłyvovy pamočnik prezidenta pa pytańniach ekanomiki Siarhiej Tkačoŭ. «Kali kazać pra padklučeńnie pryvatnaha biznesu da realizacyi, to ja nie dumaju, što pastanova 991 budzie hetamu adpaviadać», — zajaviŭ Tkačoŭ žurnalistam.
«Tut niešta nie pradumana, nie supastaŭlena z patrabavańniami žyćcia, intaresami siońniašniaha dnia, —cytavała jaho ahienctva Interfaks. – Ja nie dumaju, što heta aktualnaja pastanova, jakaja adpaviadaje patrebam krainy ŭ realizacyi pradukcyi».
Paśla takoha vypadu stała jasna, što nie vyklučanyja kadravyja vyvady. Aŭtar pastanovy piarojdzie na inšuju pracu.A mahčyma, i ŭsia hetaja historyja była adnoj vialikaj padnožkaj premjer-ministru Siarhieju Sidorskamu.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary