Hałyhina prymusili apraŭdvacca za zvarot da siłavikoŭ u 2020-m

Były rezident Comedy Club, uradženiec Barysava Vadzim Hałyhin na svajoj staroncy ŭ instahramie 16 žniŭnia 2020 hoda apublikavaŭ zvarot nastupnaha źmiestu:

«Chacieŭ by vykazać svaju hramadzianskuju pazicyju z nahody padziej, jakija adbyvajucca ŭ našaj krainie. Pieradusim chacieŭ by źviarnucca da pradstaŭnikoŭ siłavych struktur jak aficer, jak čałaviek, jaki prymaŭ prysiahu: kali łaska, spynicie krovapralićcie, spynicie hvałt nad ułasnym narodam.

Dalej. Jak čałaviek publičny, chaču źviarnucca da pradstaŭnikoŭ ułady. Prapanuju stvaryć hramadski kamitet, jaki b ad narodu vioŭ pieramovy z pradstaŭnikami ŭłady, z pradstaŭnikami siłavych struktur, i byŭ, adpaviedna Kanstytucyi, nadzieleny paŭnamoctvami dla rašeńnia hetych pytańniaŭ.

Jak čałaviek, jaki maje vialikuju kolkaść siabroŭ pa ŭsim śviecie, chaču źviarnucca da vas, maje siabry. Na siońnia ŭ Biełarusi niama levych, niama pravych. Niama prarasijskich. Niama prazachodniich. Jość adzin adziny narod — narod Biełarusi, jaki patrabuje adnavić spraviadlivaść i spynić krovapralićcie».

Amal praź piać hadoŭ, 12 červienia 2025 hoda, Hałyhinu daviałosia apraŭdvacca ŭ prahramie ministra infarmacyi Marata Markava «Ničoha asabistaha».

«U 2020-m usio było niapravilna zrazumieta ci [byli] pierakručany fakty. Ja pamiataju, jak usio raźlaciełasia: «Hałyhin padtrymaŭ». Heta ŭsio dyjamietralna supraćlehłaje», — sprabavaŭ zapeŭnić były rezident Comedy Club.

«Vadzim, Hałyhin nie padtrymaŭ?», — padkałoŭ Markaŭ.

«Ja bačyŭ prykmiety ŭsiaho taho, što nazyvajecca «vialikaj surjozna padrychtavanaj pravakacyjaj». Mahło šuhanuć tak, što mała b nikomu nie zdałosia, (…) jak suchaja trava. Moj asnoŭny pasył byŭ u tym, kab nie praliłasia kroŭ našaha naroda. (…) Kab usie supakoilisia», —

zapeŭniŭ Hałyhin i dadaŭ:

«U dalejšym, darečy, praktyčna maimi ž słovami vystupili pradstaŭniki siłavych viedamstvaŭ i hetak dalej».

Pa słovach komika, jaho vystupleńnie ŭ žniŭni 2020-m «nie było nijakim stendapam». Jon «vykazaŭ svaju hramadzianskuju pazicyju nie dla niejkich tam ŚMI».

Adnak Markavu hetaha nie chapiła. Jon nahadaŭ subiasiedniku, što zahałovak «Hałyhin padtrymaŭ pratesty» «padchapili ŭsie, pačynajučy ad našych miedyjapadobnych resursaŭ, jak zaraz ich nazyvajuć, tak i rasijskija resursy, ukrainskija».

Prapahandyst pacikaviŭsia ŭ komika, ci pastupiŭ by jon ciapier tak, jak tady.

«Ja, moža być, pa-inšamu pierafraziravaŭ. To-bok u mianie adzinaje, ab čym ja zakłapočany, što heta ŭsio było zrazumieła niapravilna», — adkazaŭ Hałyhin i znoŭ patłumačyŭ, što viedaje, jak praź internet sprabujuć «razhojdvać maładyja rozumy» i tamu jaho «asnoŭny pasył byŭ dla taho, kab nichto nie pavioŭsia na pravakacyju».

«Tak, ja nie palittechnołah nijaki, ja nie moh i nie maju prava źviartacca da kahości čahości, ja heta, jak kažuć, zrabiŭ jak moh. «Supakojciesia ŭsie». Mahčyma, kamuści heta ŭ hałavu i pajšło. Jakoj-niebudź mamie, jakaja skazała: «Synok, nie rabi hetaha, pasiadzi doma, nikudy nie chadzi» i hetak dalej».

Apraŭdvajučysia, Hałyhin śćviardžaje, što nie bačyŭ pracesaŭ, jakija adbyvajucca ŭ Biełarusi. Bo bolš za 25 hadoŭ žyvie ŭ Rasii, a ŭ Biełaruś pryjazdžaje «dapamahčy mamie, i tak dalej, i tak dalej». «Ja hetych pracesaŭ jak by nie viedaŭ i nie zaŭvažaŭ», — padkreśliŭ komik.

• 0
• 6
• 6
• 62
• 2
• 2
• 4
• 0