Častka iranskich rakiet iznoŭ prabiła «Žalezny ščyt» Izraila, adzin hmach razburany daščentu
Viadoma, što pad udar papali Bat-Jam, Ijerusalim, Tel-Aviŭ, Chajfa, Tamra, Ryšon, Ramat-Han. Usiaho za noč u Izraili zahinuli 10 čałaviek, troch čałaviek praciahvajuć šukać pad zavałami, jany ličacca źnikłymi bieź viestak, 240 čałaviek paraniena.
«Sistemy abarony pracujuć nad pierachopam pahrozy. Vy pavinny ŭvajści ŭ abaronienyja zony paśla atrymańnia paviedamleńnia i zastavacca tam da dalejšaha infarmavańnia. Vychad z abaronienaj zony budzie dazvoleny tolki paśla atrymańnia vyraznych ukazańniaŭ; vy pavinny praciahvać dziejničać u adpaviednaści ź instrukcyjami Kamandavańnia tyłu», — havorycca ŭ paviedamleńni CACHAŁ.
Nieŭzabavie źjavilisia paviedamleńni pra padzieńnie pieršych rakiet na poŭnačy Izraila.
U adnym z rajonaŭ Chajfy paśla ŭdaru pačaŭsia pažar. Paviedamlajecca pra traplańnie ŭ miascovy NPZ. Taksama pad ataku trapiŭ miascovy port.
Adzin čałaviek zahinuŭ pry iranskaj atacy pa horadzie Tamra (Nižniaja Halileja), paviedamlajuć miascovyja ŚMI. Paškodžanyja žyłyja damy, jak minimum 14 čałaviek byli paranienyja. Paśla paranienaja žančyna, jakaja znachodziłasia ŭ krytyčnym stanie, pamierła. Niekalki čałaviek znachodziacca pad zavałami razburanych damoŭ.
U horadzie Tamra amal usio nasielnictva składajuć izrailskija araby.
Pad treciuju chvalu rakiet papali Bat-Jam, Ijerusalim, Tel-Aviŭ, Ryšon, Ramat-Han. Paviedamlajecca pra šmatlikich paranienych.
Kamientary