Pieramovy Pucina z Łukašenkam zaviaršylisia. Kamplimientaŭ było šmat, kankretyki mała
Pucin i Łukašenka sustrakalisia siońnia ŭ Sankt-Pieciarburhu amal try hadziny. Z taho, što padavałasia ŭ presu — šmat uzajemnych kamplimientaŭ, ale pra sapraŭdy surjoznyja damoŭlenaści nie kažuć.
Padčas hetaj sustrečy i Pucin, i Łukašenka staralisia padkreślić, što nijakich surjoznych supiarečnaściaŭ pamiž imi niama. Tak, Pucin sam zajechaŭ za Łukašenkam pierad sustrečaj, što, viadoma, krok simvaličny.
Paśla baki rabili šmat słoŭnych kamplimientaŭ na adras adzin adnaho. Pucin adznačyŭ, što Sajuznaja dziaržava ŭ 2021 hodzie zrabiła istotny krok napierad, zhadaŭšy pra 28 padpisanych sajuznych prahram. Łukašenka ž padziakavaŭ asabista Pucinu za padtrymku Biełarusi.
Taksama Łukašenka pachvaliŭ arhanizacyju samita SND i vykazaŭ upeŭnienaść, što adbyŭsia kren «u bok našaha jadnańnia — razam vyrašać pytańni». Viadoma, usio dziakujučy Rasii.
Pucin u adkaz pachvaliŭ biełaruskuju ekanomiku — znachodzicca, maŭlaŭ, u vydatnym stanie. I rasijska-biełaruskija ekanamičnyja adnosiny taksama raźvivajucca chutkimi tempami: kali ŭ 2020 hodzie z-za pandemii ŭzrovień biełaruska-rasijskaha tavaraabarotu ŭpaŭ amal na 17%, to ŭ 2021-m — rost na 36%. Taksama Pucin acaniŭ jak «dobry krok» rašeńnie dapuścić da rasijskich dziaržzakupak biełaruskija pradpryjemstvy.
Kali ž adkinuć uzajemnyja kamplimienty, to kankretnych vynikaŭ sustrečy, pra jakija pakul paviedamlajecca aficyjna, tolki dva. Łukašenka i Pucin damovilisia pra kaapieracyju ŭ avijabudaŭnictvie i paćvierdzili namiery pravieści ŭ 2022 hodzie čarhovyja sumiesnyja vajskovyja vučeńni na terytoryi Biełarusi. Termin ich praviadzieńnia — prykładna luty-sakavik 2022 hoda.
Ciapier Pucin z Łukašenkam pajechali hulać u chakiej.
Pucin na pieramovach z Łukašenkam pachvaliŭ biełaruskuju ekanomiku
Ciapier čytajuć
«Dzieci rastuć z adčuvańniem, što być biełarusam pačesna, jak vypusknikom Harvarda». U Batumi dziejničaje biełaruskamoŭnaja škoła — voś jak heta pracuje88
Kamientary