Pamior ksiondz Michaił Sapiel — pieršy probašč adrodžanaj parafii śviatoha Rocha na Załatoj Horcy

U rozny čas śviatar byŭ dušpastyram u parafijach Maci Božaj Ružancovaj i śviatoha Daminika ŭ Rakavie, Naradžeńnia Maci Božaj u Zasłaŭi, dyrektaram DKT Caritas Minska i Biełarusi, uznačalvaŭ kamisiju pa pierakładzie liturhičnych tekstaŭ.

Infarmacyja pra pachavańnie śviatara budzie ahučanaja paźniej.

Pavialičyć

Ksiondz Michał Sapiel naradziŭsia 17 listapada 1967 hoda ŭ Brasłavie. Ciamja Sapielaŭ była «źmiašanaj»: baćka — pravasłaŭny, maci — katalička. 

Skončyŭšy siaredniuju škołu ŭ 1984 hodzie, Michał adčuvaŭ paklikańnie da śviatarstva, adnak vyrašyŭ spačatku pastupić u miedycynskaje vučylišča ŭ łatvijskim Daŭhaŭpiłsie. Prapiska ŭ susiedniaj respublicy dała jamu mahčymaść praz hod pastupić u duchoŭnuju sieminaryju ŭ Ryzie, jakuju jon paśpiachova skončyŭ u 1990 hodzie.

U 1990-m małady śviatar byŭ skiravany ŭ Minsk i pryznačany vikaryjem kaścioła Uzvyšeńnia Śviatoha Kryža na Kalvaryjskich mohiłkach, a paźniej ad arcybiskupa i budučaha kardynała Kazimira Śviontka atrymaŭ zadańnie dušpastyrskaj apieki nad tymi, chto ŭ Minsku žadaŭ malicca pa-biełarusku (parafija śviatoha Rocha).

Ruplivaściu ksiandza Michała i jaho supracoŭnikaŭ pa liturhičnaj kamisii raspačałasia i paśpiachova raźvivałasia mietadyčnaja praca pa pierakładzie liturhičnych tekstaŭ na biełaruskuju movu, hałoŭnym plonam jakoj staŭ vydadzieny ŭ 2004 hodzie «Rymski Imšał dla dyjacezij na Biełarusi».

Na plečy maładoha śviatara Michała Sapiela lahła jašče adna adkaznaja misija: u miascovym kaściole jamu było daručana naładzić dabračynnuju dziejnaść. I z hetym zadańniem jon paśpiachova spraviŭsia: u 1991 hodzie ŭ Minsku źjaviłasia svaja arhanizacyja Caritas.

Užo praź niekalki hadoŭ biełaruski Caritas ad banalnaha prymańnia humanitarnaj dapamohi i jaje raźmierkavańnia pierajšoŭ da realizacyi sapraŭdy surjoznych prajektaŭ, najbujniejšy ź jakich — dziciačy centr u Laskoŭcy.

Pavialičyć

Akramia parafii na Załatoj Horcy, ksiondz Michał Sapiel da 1996 hoda byŭ probaščam parafii ŭ Rakavie i peŭny čas z dušpastyrskaj nieabchodnaści słužyŭ viernikam u Zasłaŭi.

Dziakujučy hramadska-palityčnym pieramienam na pačatku 90-ch hadoŭ minułaha stahodździa, adnavilisia nabaženstvy ŭ adnoj z zabranych savieckimi ŭładami minskich śviatyń — kaściole Najśviaciejšaj Trojcy (śviatoha Rocha) na Załatoj Horcy.

Vakoł pieršaha ŭ paślavajenny čas dušpastyra chutka sabrałasia staličnaja katalickaja moładź, jakaja žadała malicca na rodnaj movie i mieła tut takuju mahčymaść, jašče redkuju ŭ tyja časy.

«Toj čas niaredka nazyvajuć «viasnoju Kaścioła» na Biełarusi: tak spora ŭzychodzili tady parastki paklikańnia ŭ sercach moładzi. Parafija na Załatoj Horcy stała miescam, dzie hetych viesnavych uschodaŭ było asabliva šmat. Z hetaj staličnaj katalickaj supolnaściu źviazanaje naradžeńnie, raźvićcio i realizacyja paklikańniaŭ da słužeńnia Bohu ŭ śviatarstvie ks. Anatola Parachnieviča, siońniašniaha probašča ŭ Alkovičach, ks. kanonika Alaksandra Čajkoŭskaha, probašča ŭ Navapołacku, ks. Kanstancina Karaki, probašča ŭ Hłusku, ks. kanonika Juryja Bykava, probašča ŭ Radaškovičach, ks. kanonika Piatra Šarko, probašča ŭ Niaśvižy, ks. Aleha Žuraŭskaha, probašča ŭ Navajelni, ks. Mikoły Hrakava, vikaryja Załatahorskaj parafii, a taksama biskupa Viciebskaha Aleha Butkieviča», — zaznačaje catholic.by.

• 0
• 0
• 0
• 0
• 0
• 1
• 0
• 0