U niadzielu na musulmanskich mohiłkach u padlašskaj vioscy Bahoniki pachavali 37-hadovaha mihranta Mustafu Machamieda, cieła jakoha znajšli niedaloka ad miažy ź Biełaruśsiu, kala vakolic vioski Haradok. Viadoma, što mužčyna pamior ad pieraachaładžeńnia, piša «Radyjo Svaboda».
Na tym ža miescy raniej adbylisia jašče dva pachavańni — 19-hadovaha siryjca i mužčyny, cieła jakoha znajšli kala miažy — ale jaho asobu ŭstanavić nie ŭdałosia.
Pachavańnie adkładałasia praź dziejańni prakuratury, a taksama ŭskryćcio trupa mužčyny. U svaju čarhu ambasada Jemiena šukała kantakt ź siamjoj zahinułaha.
«Heta musulmanskija mohiłki, i hetyja mohiłki źjaŭlajucca miescam spačynu ŭsich musulman z usiaho śvietu, niezaležna ad taho, heta vychadcy ź Jemiena, Sudana ci našy tatary — niavažna chto, važna, što heta musulmanie — tady my biaromsia za takoje abaviazacielstva. U pryvatnaści, ja, jak kiraŭnik musulmanskaj relihijnaj supołki ŭ Bahonikach, zajmajusia relihijnymi pytańniami, a potym vykonvaju hetuju rytualnuju častku», — skazaŭ imam Alaksandr Ali Bazarevič.
U Bahonikach kampaktna pražyvajuć pradstaŭniki tatarskaj mienšaści. Infarmacyju ab pachavańni pieradali siamji zahinułaha.
Kamientary