Ramančuk: Treba, kab Paźniak jechaŭ u krainu i pasprabavaŭ z čystaha lista razmaŭlać z uładami Biełarusi
Ekanamist Jarasłaŭ Ramančuk u intervju «Radyjo Svaboda» vykazaŭsia pra niebiaśpieku sankcyjaŭ i što siońnia treba terminova zrabić dla dyjałoha ŭ krainie.
Analityk miarkuje, što ekanamičnyja sankcyi Zachadu viaduć da straty suvierenitetu na karyść Rasii.
— Siońnia adbyvajecca ŭciahvańnie Biełarusi ŭ arbitu vajskovaj, infarmacyjnaj, dypłamatyčnaj i hieastratehičnaj palityki Rasii. A heta ŭžo erozija našaha suvierenitetu. Kali raniej ja vystupaŭ suprać sankcyj, ja mienavita heta mieŭ na ŭvazie.
Toje, što siońnia stolki biełarusaŭ apynulisia za miežami, toj stan hramadska-palityčnaha supracivu i toj stan zaležnaści, jaki my majem siońnia z 28-ju darožnymi mapami…
Z usim hetym rasijcy mohuć zrabić tak, što na vosień 2022 hodu kolkaść ludziej, jakija buduć łabiravać intaresy Kramla, budzie bolšaju za kolkaść tych, chto budzie łajalny Łukašenku.
Heta, biezumoŭna, zjaŭlajecca pahrozaj našamu suvierenitetu i isnavańniu niezaležnaści našaj krainy.
— Ci mohuć sankcyi Zachadu dasiahnuć svajoj mety — demakratyzacyi Biełarusi i pačatku ŭnutrynacyjanalnaha inkluziŭnaha dyjałohu?
— Kali jeŭrapiejcy i amierykancy ŭvodziać sankcyi, treba razumieć, jakija časavyja paramietry jany majuć na ŭvazie.
Hod — nie realistyčna. 5 hadoŭ — moža być i dasiahnuć, ale za piać hadoŭ Biełaruś moža stracić svaju niezaležnaść.
Tamu ŭ karotkaterminovaj pierśpiektyvie vykanańnie taho paradku dnia, jaki majuć na ŭvazie aŭtary sankcyj, — nierealistyčnaje.
Zamiest dyjałohu my majem jašče bolšaje zakatvańnie ŭ asfalt hramadska-palityčnaj supolnaści. Zamiest sproby admatać nazad my bačym aktyŭnuju prakramloŭskuju palityku, jakaja jašče bolš uciahvaje ŭłady Biełarusi ŭ arbitu rasijskich intaresaŭ.
Tak što sankcyi nie dajuć taho efiektu, na jaki raźličvajuć ich aŭtary. I heta, biezumoŭna, trahiedyja tych ludziej, jakija zastajucca ŭ Biełarusi i pracujuć u hramadstvie, jakoje znachodzicca ŭ stanie šoku, strachu, depresii i pryhłušanaha, unutranaha hnievu.
Apošnija apytańni Chatham House pakazvajuć, što Łukašenka maje padtrymku niedzie 30%.
Pry dapamozie svajho «amonaprava» jon moža kansalidavać jašče stolki ž i skazać: «Ja znoŭ staŭ narodnym prezidentam».
— Jakoje, na vašu dumku, vyjście z hetaj situacyi?
— Vyjście ciapier niaprostaje. Ciapier treba dumać, jak admatać nazad i znoŭ naładzić masty dla hramadskaj i palityčnaj pracy ŭ krainie. Tak ci inačaj, ja b nia raiŭ uvodzić sankcyi ŭ takim režymie, jak jany ŭvodziacca ciapier. Bo jany bjuć pa śviataja śviatych — pa našym suvierenitecie i niezaležnaści.
Kali pry ciapierašnim stanie praz hod-dva nie budzie źmienaŭ, to ja dumaju, što my budziem razmaŭlać z hienierałami i pałkoŭnikami, jakija buduć pradstaŭlać užo inšy vajskova-palityčny režym u našaj krainie.
Tak što jość patreba na niejki inkluziŭny dyjałoh. Dla hetaha možna vykarystoŭvać patencyjał i aŭtarytet taho ž Zianona Stanisłavaviča Paźniaka, kab jon pajechaŭ u krainu i pasprabavaŭ z čystaha lista razmaŭlać z uładami Biełarusi.
— Ale pakul što Łukašenka na nijaki dyjałoh ni z kim nie idzie.
— Ź Cichanoŭskaj na dyjałoh jon sapraŭdy nie idzie, a z Paźniakom moža pajści.
Kamientary