Toje, što vy budziecie hladzieć. Novaja karejskaja drama «Hulnia ŭ kalmara» zavajoŭvaje śviet
Paŭdniovakarejski sieryjał «Hulnia ŭ kalmara» moža akazacca najvialikšym pośpiecham u historyi servisu Netflix, što zajmajecca jaho vytvorčaściu. Adnak na praciahu dziesiaci hadoŭ miascovyja studyi nie žadali bracca za hetaje šou, bo jaho kancepcyja zdavałasia im zanadta absurdnaj i nierealistyčnaj.
Zhodna ź siužetam dramy, źbiadniełyja darosłyja hulajuć na izalavanym vostravie ŭ karejskija narodnyja dziciačyja hulni. Tyja, chto prajhraje, pamirajuć, a adziny pieramožca atrymlivaje hrašovuju ŭznaharodu pamieram prykładna ŭ 40 miljonaŭ dalaraŭ, piša Wall Street Journal.
Pieršyja hledačy pabačyli «Hulniu ŭ kalmara» 17 vieraśnia, i ciapier hety sieryjał — suśvietny fienomien. Pa siervisie TikTok razychodziacca videa ź imitacyjami hulniaŭ z šou, a internet-kramy pradajuć kaściumy ŭ styli «Hulni ŭ kalmara». Bolš čym u 90 krainach sieryjał zajmaje pieršyja miescy pa prahladach siarod usich šou Netflix. Heta dobryja naviny dla kampanii va ŭmovach biesprecedentnaj kankurencyi, kali siervisy-supierniki sprabujuć stvaryć svaje chity i pieramanić hledačoŭ.
Stvaralnik «Hulni ŭ kalmara» Chvan Don-Chiok prydumaŭ ideju šou bolš za dziesiać hadoŭ tamu, kali žyŭ razam z maci i babulaj. Jon navat pačaŭ pisać scenaryj, ale pracu daviałosia spynić.
U toj čas patencyjnyja inviestary i akciory byli niezadavolenyja siužetam dramy praz najaŭnaść u filmie žorstkich zabojstvaŭ i niepraŭdapadobnaść situacyi, kali ludzi ryzykujuć śmierciu dziela mahčymaści vyjhrać hrošy.
Adnak dva hady tamu bosy Netflix vyrašyli, što prykłady kłasavaj baraćby z «Hulni ŭ kalmara» nasamreč blizkija da realnaści.
Chvan tłumačyć, što kali suśvietnaja ekanomika adčuła na siabie ŭdar pandemii kavidu, roźnica pamiž bahatymi i biednymi ŭ śviecie jašče bolš abvastryłasia. Navat toje, jakija vakcyny suprać kavidu dastupnyja ŭ roznych krainach, šmat u čym zaležyć ad taho, ci bahataja heta kraina albo biednaja.
Anhłamoŭnaja viersija trejlera «Hulni ŭ kalmara» ŭžo nabrała na Youtube bolš za 18 miljonaŭ prahladaŭ. Heta jak minimum utraja pieravyšaje pakazčyki trejleraŭ «Brydžertonaŭ» ci «Lupiena» — inšych chitoŭ ad Netflix.
U samoj Paŭdniovaj Karei nie zastalisia abyjakavymi da suśvietnaha pośpiechu sieryjała. Miascovyja miedyja paraŭnoŭvajuć šou z «Parazitami» — paŭdniovakarejskim filmam, što ŭziaŭ u 2020 hodzie šeść statuetak «Oskara».
Navat kandydaty ŭ prezidenty Paŭdniovaj Karei spasyłajucca na šou ŭ svajoj pieradvybarnaj honcy. Niekatoryja ź ich robiać paradyjnyja płakaty ŭ styli sieryjała abo zaprašajuć adno adnaho pryniać udzieł u spabornictvach nakštałt «Hulni ŭ kalmara».
Kamientary