Stvarajecca baza dla raspaznavańnia biełaruskaha maŭleńnia — dałučycca moža kožny

Heta ŭ budučyni pojdzie na karyść raźvićcia technałohijaŭ raspaznavańnia biełaruskaha maŭleńnia, adkryje mnostva vydatnych sučasnych mahčymaściaŭ i dakaža, što ŭ našaj movy jość budučynia!

Praces nadzvyčaj prosty: 

1. Treba zajści na staronku i nacisnuć na mikrafon!

2. Pačać načytvać skazy. Možna z telefona, možna biez rehistracyi. 

3. Taksama možna praviarać užo načytanyja inšymi ludźmi skazy, što taksama važna.

«Technałahičnyja hihanty nie inviestujuć u raspaznavańnie biełaruskaj movy i my zastajemsia bieź istotnaj technałohii, bieź jakoj našaj movie budzie jašče składaniej kankuravać. Kali my nie naźbirajem dadzienyja sami, za nas heta nichto nie zrobić»,

— kaža Alaksiej Hurjanaŭ, IT dyrektar kampanii TKP-Soft, jakaja vyrašyła dapamahčy napracavanymi technałohijami ŭ raspaznavańni biełaruskaha maŭleńnia.

Dziela aktyvizacyi biełaruskaj movy ŭ mižnarodnym prajekcie Mozilla Common Voice nieabchodnym minimumam źjaŭlalisia 5000 skazaŭ. Kamandzie say.by atrymałasia zaćvierdzić 85'000.

Kiravaŭ hetym pracesam Alaksandr Trafimaŭ: «My pajšli praz paŭaŭtamatyčny šlach. Ź biełaruskaj vikipiedyi nami było vyhružana blizu 85'000 skazaŭ. Dalej adbyłasia pravierka vypadkovaj padvybarki ŭ 4'000 skazaŭ movaznaŭcami-vałanciorami, za što im asabisty i asablivy dziakuj! Heta dazvoliła mejntejnieram Mozilla Common Voice aktyvizavać biełaruskuju movu i raspačać praces ahučvańnia!»

Akramia mahčymaści realizavać prajekt say.by «Mova prafiesii» pryśviečany treniroŭcy žyvoj razmovy i paćvierdžańniu vałodańnia biełaruskaj movaj, nabor zapisaŭ hałasoŭ stanie dastupnym navukoŭcam, prahramistam, IT-kampanijam i ŭsim achvotnym rabić prajekty, źviazanyja z raspaznavańniem i sintezavańniem biełaruskaha maŭleńnia, dadać padtrymku ŭ isnyja prahramy i mabilnyja dadatki.

«Aŭtamatyčnyja sistemy raspaznavańnia maŭleńnia pieraŭtvarajuć maŭleńnie ŭ tekst. Naprykład, žurnalist zapisaŭ na dyktafon intervju, i praz prahramu raspaznavańnia maŭleńnia z dapamohaj niekalkich klikaŭ jon atrymaje z hukazapisu tekst. 

Z dapamohaj raspaznavańnia maŭleńnia źjavicca mahčymaść kiravać technikaj hołasam pa-biełarusku — śviatłom, tempieraturaj, mikrachvaloŭkaj, mabilnym telefonam zamiest naciskańnia knopak.

Nivodnaja z najaŭnych infarmacyjnych sistemaŭ nie raspaznaje biełaruskuju movu! U śpisie movaŭ raspaznavańnia maŭleńnia Google taksama niama biełaruskaj. U 2018-2020 hadach u našaj łabaratoryi byŭ stvorany maŭlenčy korpus na 70 hadzin dla treniroŭki sistemy raspaznavańnia maŭleńnia pa-biełarusku, na jaho asnovie byŭ raspracavany pieršy pratatyp sistemy raspaznavańnia biełaruskaha maŭleńnia.

A zaraz jość mahčymaść ažyćciavić nastupny krok — zrabić jakasny vialiki biełaruski maŭlenčy korpus, jaki daść mahčymaść kožnamu achvotnamu zrabić svaju sistemu raspaznavańnia biełaruskaha maŭleńnia i vykarystać jaje dla navukovych ci kamiercyjnych metaŭ!» — śćviardžaje navukoviec AIPI NAN Biełarusi, kandydat techničnych navuk Juraś Hiecevič.

Da marafonu ahučvańnia tekstaŭ dałučylisia i supracoŭniki kampanij AZS A-100, Pivavarnaj kampanii Alivaryja, TCP-Soft, ActiveCloud, Jet BI, Instytut movaznaŭstva imia Jakuba Kołasa, Šparki Łoś, Chutki Vožyk. Arhanizatary zaprašajuć da ŭdziełu ŭsie kampanii i supolnaści, bo heta nie tolki cikavaja, ale i važnaja aktyŭnaść dla ŭsich biełarusaŭ.

Padčas ahučvańnia vaš hołas musić hučać naturalna, niby adbyvajecca zvyčajnaja razmova. Pamiatajcie i pra svoj biełaruski akcent — ćviordaje č, frykatyŭnaje h, «dziekańnie» i «ciekańnie», «miakkaść» pry spałučeńni zyčnych, naprykład «śviet» čytajecca jak «śviet», «nasieńnie» — jak «nasieńnie».

Pačać praces, pahladzieć dadatkovyja parady, a taksama apošniuju statystyku pa kolkaści ahučanych skazaŭ možna na sajcie Mova.pro. 

• 1
• 0
• 0
• 0
• 0
• 0
• 0
• 0