Piatroŭski patłumačyŭ svaju dumku, što Maskva zacikaŭlenaja ŭ vyzvaleńni biełaruskich palitviaźniaŭ
«Adzinaja kropka parazumieńnia miž ZŠA i Rasijaj, u jakoj jany majuć zhodu pa Biełarusi, — heta amnistyja viaźniaŭ».
Analityk «Biełaj Rusi» Piotra Piatroŭski vystupiŭ z dastatkova niečakanaj tezaj, što na vyzvaleńni palitviaźniaŭ ad Minska ciapier buduć nastojvać i Maskva, i Vašynhton. «Naša Niva» ŭdakładniła: adkul takija dumki adnosna žadańniaŭ Rasii?
«Naša Niva»: Čamu vy miarkujecie, što Rasija zacikaŭlenaja ŭ tym, kab u Biełarusi prajšła amnistyja palitviaźniaŭ?
Piotra Piatroŭski: Rasija maje takuju stratehiju adnosna ZŠA, kab pavialičyć ułasny kalidor manieŭraŭ, źmienšyć sankcyjny cisk, mieć mahčymaść adnavić niekatoryja stasunki i inviestycyjnaje supracoŭnictva. Štaty ŭ kantekście svajoj baraćby ź siłaj Kitaja i niedapuščeńnia aljansu Kitaja z Rasijaj hatovyja pajści na niekatoryja pasłableńni. Heta my bačym užo i pa «Paŭnočnym patoku», i pa Ukrainie, i pa inšych rečach.
Ja prahnazuju, što pamiž Rasijaj i Zachadam jość adziny punkt, u jakim jany majuć zhodu pa Biełarusi — heta amnistyja viaźniaŭ. Heta paćviardžajecca chacia b tym, što paśla sustrečy Łukašenki i Pucina ŭ Sočy pačaŭsia praces pramacvańnia biełaruskim kiraŭnictvam hleby pa mahčymaj amnistyi. Dumaju, heta toj kansensus, jaki majuć Maskva i Vašynhton pa Biełarusi, jaki zadavolić abodva baki.
Kali my ŭspomnim 2011 hod, to byŭ taki ž scenar. Maskva i Zachad pahadzilisia na niekatoryja rečy pa amnistyi źniavolenych pa padziejach 19 śniežnia 2010 hoda.
Ale hałoŭnaje pytańnie, ci pahodzicca na takoje aficyjny Minsk. Pakul my bačym tolki pramacvańnie hleby, ale: a) kolkaść źniavolenych našmat bolšaja za 2011 hod; b) u adroźnieńnie ad 2011 hoda, majecca zadača pravieści kanstytucyjnuju reformu i pierafarmatavać apazicyjnaje pole. U suviazi z hetym Minsk budzie maksimalna adciahvać čas amnistyi. Najbolš vyhadny čas — kali projdzie refierendum i kali ŭvojdzie ŭ siłu novy zakon ab partyjach i hramadskich arhanizacyjach, projduć pierarehistracyju dziejnyja partyi.
U novych praviłach hulni aficyjny Minsk moža ŭžo volna iści na praceduru amnistyi. Tut pracuje takaja dyjalektyka pamiž žadańniami aficyjnaha Minska i žadańniami Maskvy i Zachadu. Što chto vytarhuje tut — pakul niezrazumieła.
«NN»: Havorka nie pra humanistyčnyja pamknieńni z boku Maskvy, a pra stratehičnyja intaresy?
PP: Toje samaje i dla ZŠA. Heta nie humanistyčnaje pytańnie, a zachavańnie tvaru. ZŠA pavinny rastłumačyć svajmu elektaratu, svaim elitam, Maskva — zadavolić svaje patreby. U miežach taho, što ŭ Rasii bolš libieralny režym, to zadavolić libieralnuju viežu Kramla.
Pry hetym adbudziecca demanstracyja, što Maskva idzie nasustrač Vašynhtonu, a ZŠA nasustrač Rasii. I toje pramacvańnie pierazahruzki, jakoje my bačym miž Bajdenam i Pucinym, budzie zapuskacca ŭ tym liku ŭ miežach biełaruskaha kiejsu.
«NN»: Dla Maskvy aryštavanyja ŭ Biełarusi — palitviaźni ci nie?
PP: Palitviaźni jany aficyjna tolki dla hramadskich arhanizacyj. Usio. Dla Maskvy, dla Vašynhtona — heta prosta mahčymaść palityčnaha handlu, nie bolej.
«NN»: 3 lipienia mahčymaja pieršaja partyja amnistavanych viaźniaŭ?
PP: Mnie vielmi składana heta prahnazavać. Nakolki viedaju, jakraz zaraz iduć pieramovy. Ale z punktu hledžańnia intaresaŭ Minska — naŭrad ci.
Kamientary