Julija Čarniaŭskaja praz advakata raskazała, jak žyvie pad chatnim aryštam

«Darahija maje! Dyktuju hetyja słovy majmu advakatu, tamu što sama pisać ja nie maju ni prava, ni mahčymaści. Vy viedajecie, što ja pad chatnim aryštam. Heta zdaryłasia 18 maja, nazaŭtra paśla hadaviny pa Juru. Dziakuj bohu, ja paśpieła pastavić pomnik i prynieści kvietki. Na adkryćcio miemaryjalnaj doški dziaduli 26 (majecca na ŭvazie, 26 maja. — Zaŭv. Tut.by) ja, viadoma, nie patrapiła. Ciapier, kali ja amal miesiac u hetaj nieabžytaj kvatery, kudy pierajechała tolki za 6 dzion da aryštu, ja ŭžo zmahła ŭstalavać sabie niejkija praviły i rasparadak dnia.

Ja šmat čytaju, hładžu sabaku, słuchaju muzyku i maluju. A jašče, niahledziačy na prablemy sa zdaroŭjem, vychodžvaju ŭsio bolš krokaŭ pa kvatery. Mnie tak šmat zastałosia ad Jury — i dyski (choć pałovu ich nie biare muzyčny centr, jany vielmi staryja), i sabaka, padorany mnie na dzień naradžeńnia im ža. I navat norma krokaŭ, jakoj ja zaŭsiody hrebavała, asabliva kali stała drenna sa zdaroŭjem. I voś heta jaho kryło, jakoje jon tak i nie prybraŭ z majho plača, daje siły žyć u hetyja vielmi dziŭnyja dni.

Ja nikoli nie dumała, što Kafka — realnaść. Ja razumieju, što mnie hłyboka pašancavała ŭ paraŭnańni z tymi, u kaho aryšty daloka nie chatnija i ŭ sumlennaści kaho ja nie sumniavałasia. Ja za ich malusia — heta toje, što ja mahu rabić.

Mnie pašancavała ŭ tym, što ŭ mianie jość siabry i vy, jakija taksama siabry. Jašče mnie pašancavała z drevami pad aknom. Na Niamizie ja nastolki zabyłasia pra šelest dreŭ, što tut mnie spačatku zdavałasia, što pačynajecca doždž. Tut byvajuć vielmi paŭnakroŭnyja viasiołki. I kali pryhledziecca, z majho akna vidać koła ahladu. Jak nazyvałasia adna staraja karcina — «Usiudy žyćcio».

Mnie vielmi dapamahajuć viestački ad vas. Mnie vielmi pašancavała z vami. Žyvicie radasna. Dziakuj vam, darahija.

Lublu vas, niaźmiennaja JUČ.»

Nahadajem, ranicaj 18 maja dadomu da niekatorych supracoŭnikaŭ Tut.by pryjšli supracoŭniki DFR. Siłaviki taksama pryjšli ŭ ofis kampanii Tut.by u budynku Omega Tower.

Kamitet dziaržkantrolu paviedamiŭ, što ŭ dačynieńni da słužbovych asob Tut.by raspačali kryminalnuju spravu pa prykmietach składu złačynstva, praduhledžanaha č. 2 art. 243 KK (Uchileńnie ad vypłaty sum padatkaŭ, zboraŭ u asabliva bujnym pamiery). U 2019 hodzie kampanijaj atrymany status rezidenta Parka vysokich technałohij (PVT). Pavodle Departamienta finansavych rasśledavańniaŭ, Tut.by atrymaŭ vyručku, «nie abumoŭlenuju dziejnaściu, dazvolenaj dla rezidentaŭ PVT».

Na siońnia pa spravie Tut.by zatrymanyja 15 našych kalehaŭ: Ludmiła Čekina, Maryna Zołatava, Volha Łojka, Alena Taŭkačova, Anžeła Asad, Iryna Rybałka, Maryja Novik, Ała Łapatka, Alaksandr Dajnieka, Andrej Aŭdziejeŭ, Siarhiej Pavališaŭ, Darja Daniłava, Kaciaryna Tkačenka, Iryna Kaściučenka i Julija Čarniaŭskaja.

• 0
• 0
• 0
• 0
• 0
• 0
• 0
• 0