Były daradca Trampa prapanuje Zachadu dać Łukašenku nadziejnyja harantyi, a Pucinu — «Paŭnočny patok»
Džon Bołtan, były daradca Trampa, ličyć, što ZŠA i ES dapuścili stratehičnuju pamyłku minułym letam, kali niedastatkova adreahavali na pratesty paśla vybaraŭ prezidenta Biełarusi.
Paśla incydentu z Ryanair Zachad adzinahałosna asudziŭ dziejańni biełaruskaha ŭrada i abmiežavaŭ avijaznosiny ź Biełaruśsiu. U adkaz na heta Pucin paabiacaŭ padtrymku Alaksandru Łukašenku.
Niama sumnieńniaŭ u tym, što Zachad spraviadliva nazvaŭ incydent z Ryanair pavietranym piractvam. Taki ŭčynak całkam adpaviadaje aŭtarytarnym mietadam režymu, jakija charakternyja i dla Rasii ŭ tym liku, piša The Washington Post.
Adnak na dumku Bołtana, zachodniaja stratehija ŭ adnosinach da Biełarusi ŭ vyhladzie ekanamičnych sankcyj nie adkazvaje na bolš važnaje pytańnie: jakaja budučynia čakaje Biełaruś? Ci dapamohuć hetyja sankcyi prytrymlivacca Biełarusi šlachu, aryjentavanaha na Zachad? Ci ŭ vyniku ŭsio moža skončycca anieksijaj Biełarusi Rasijaj?
U žniŭni minułaha hoda pratesty ŭ Biełarusi byli vyklikanyja pierš za ŭsio sfalsifikavanymi vybarami, tamu pazicyja demanstrantaŭ była ni prazachodniaj, ni prarasijskaj. Uvaha administracyi Trampa ŭ toj čas była skiravanaja na pieradvybarnuju kampaniju ŭ ZŠA, tamu reakcyja na padziei ŭ Biełarusi była słabaja. U vyniku Łukašenka da hetaha času zachoŭvaje ŭładu, što śviedčyć pra stratehičnuju pamyłku Zachadu i ZŠA.
Bołtan ličyć, što nie źviartać uvahu na hieapalityčnyja abstaviny naiŭna i niebiaśpiečna dla biełarusaŭ, bo nichto ŭ Maskvie nie bačyć dla Biełarusi inšaha losu, akramia jak jašče bolšaje pahłybleńnie suviaziaŭ z Rasijaj.
Miescaznachodžańnie Biełarusi stvaraje pahrozu rasijskaha interviencyjanizmu. Tamu budučynia biełarusaŭ źviazanaja i z budučyniaj Jeŭrasajuza. Padtrymka demakratyčnych sił Biełarusi — heta bolš, čym zmahańnie za pravy čałavieka. Pad ryzykaj znachodzicca patencyjnaja svaboda ŭsich 9,5 miljonaŭ biełaruskich hramadzian, bo intehracyja Biełarusi i Rasii faktyčna źniščyć usie šancy biełarusaŭ na realnuju svabodu.
Toj fakt, što paśla spynieńnia masavych demanstracyj uvaha Zachadu da Biełarusi značna źniziłasia i viarnułasia tolki paśla zatrymańnia Ramana Pratasieviča, pakazvaje, što taki niesistemny, častkovy padychod da biełaruskaj prablemy niaŭstojlivy i naŭrad ci budzie paśpiachovym.
Tamu bolš metazhodny padychod, na dumku Bołtana, — zabiaśpiečyć Łukašenku i jaho paplečnikam absalutnyja harantyi dla sychodu. Adnak heta patrabuje raspracoŭku kompleksnaha płana, z ulikam mahčymych vajennych dziejańniaŭ Rasii ŭ adnosinach da Biełarusi. Adnak dla strymlivańnia Rasii ŭ ZŠA jość patencyjny kozyr — niaskončany «Paŭnočny patok — 2», jaki Pucinu vielmi važny.
Niekatorych moža aburyć ideja biespakaranaści Łukašenki, ale na prykładzie byłych kamunistyčnych dziaržaŭ bačna, što budučynia krainy važniejšaja za pryciahnieńnie da adkaznaści luboj canoj.
Nielha niedaaceńvać, nakolki składanyja pierśpiektyvy čakajuć Biełaruś pry lubym raskładzie. Ale vidavočna, što sankcyi i asudžeńnie režymu nie źmieniać pavodzin Łukašenki, a tolki padšturchnuć jaho da bolšaj intehracyi z Rasijaj, što pahražaje strataj suvierenitetu Biełarusi.
Kamientary