Dziaržsakratar ZŠA: Pradpryjemstvy, zakranutyja sankcyjami, spryjajuć represijam suprać biełaruskaha naroda

Jon nazvaŭ źniavoleńnie Siarhieja Cichanoŭskaha, Maryi Kaleśnikavaj i Ihara Łosika prykładami represijaŭ u Biełarusi, jakija robiać niemahčymym dalejšaje prypynieńnie sankcyjaŭ, piša Radyjo Svaboda.

U zajavie havorycca, što Dziaržaŭny departament ZŠA całkam padtrymlivaje rašeńnie Ministerstva finansaŭ i što hety krok źjaŭlajecca nastupstvam hrubaha ihnaravańnia pravoŭ čałavieka biełaruskimi ŭładami i nievykanańnia Biełaruśsiu svaich abaviazańniaŭ pavodle mižnarodnych normaŭ u sfery pravoŭ čałavieka.

U 2015 hodzie Ministerstva finansaŭ ZŠA — u kansultacyjach ź Dziarždepartamentam — prypyniła sankcyi ŭ suviazi z peŭnym prahresam u sfery demakratyi i pravoŭ čałavieka. U pryvatnaści, heta było źviazana z vyzvaleńniem palitviaźniaŭ, adznačajecca ŭ zajavie.

«Adnak u vyniku ŭładnych represij vakoł sfalšavanych prezydenckich vybaraŭ u žniŭni 2020 hodu i paśla ich, ciapier u Biełarusi bolš za 340 palityčnych źniavolenych. Uličvajučy rezkaje paharšeńnie sytuacyi z pravami čałavieka ŭ Biełarusi, urad ZŠA pierakanany, što dalejšy praciah [prypynieńnia sankcyj] nia budzie adpaviadać Aktu ab demakratyi ŭ Biełarusi i budzie niesumiaščalny z amerykanskimi kaštoŭnaściami. Dzieviać dziaržaŭnych pradpryjemstvaŭ, zakranutych hetym dziejańniem, finansujuć i padtrymlivajuć režym Łukašenki, spryjajučy hvałtoŭnym represijam suprać biełaruskaha narodu i nieadnarazovamu admaŭleńniu ad viaršenstva zakonu», — havorycca ŭ zajavie dziaržsakratara ZŠA.

Prykładami represijaŭ u Biełarusi ŭ zajavie nazyvajecca źniavoleńnie «patencyjnych palitykaŭ, takich jak Siarhiej Cichanoŭski, mužnych lideraŭ-aktyvistaŭ, takich jak Maryja Kaleśnikava, i niezaležnych medyja-ekspertaŭ, takich jak Ihar Łosik. Heta tolki troje z sotniaŭ biełarusaŭ, niespraviadliva źniavolenych režymam Łukašenki za karystańnie svaimi pravami čałavieka i fundamentalnymi svabodami».

Złučanyja Štaty zaklikajuć ułady Biełarusi «nieadkładna i biezumoŭna vyzvalić usich niespraviadliva zatrymanych i źniavolenych». Akramia taho, u zajavie havorycca, što ZŠA buduć pracavać razam ź mižnarodnaj supolnaściu, kab paspryjać adkaznaści tych, chto parušaŭ pravy čałavieka ŭ Biełarusi.

«Pavaha da pravoŭ čałavieka, viaršenstva zakonu i abaviazańniaŭ Biełarusi pierad Arhanizacyjaj biaśpieki i supracoŭnictva ŭ Eŭropie zastajucca centralnymi dla palapšeńnia dvuchbakovych adnosinaŭ», — adznačajecca ŭ kancy zajavy dziaržaŭnaha sakratara ZŠA Entani Blinkiena.

ZŠA adnavili sankcyi suprać «Biełnaftachima» i jašče 8 biełaruskich kampanij

• 0
• 0
• 0
• 0
• 0
• 0
• 0
• 0