Doktar Martaŭ adkazaŭ Łukašenku: «Padača kisłarodu nie zaležyć ad taho, ci apazicyjanier zahadčyk adździaleńnia»
U piatnicu, 12 sakavika, Alaksandr Łukašenka padčas vizitu ŭ maładziečanskuju balnicu spytaŭ u ministra achovy zdaroŭja Dźmitryja Pinieviča pra nadzvyčajnuju situacyju z kisłarodam u BCHMD Viciebska. «Nu kali tam palityka, to značyć treba na miesca čałavieka stavić», — zajaviŭ Łukašenka. Pinievič paabiacaŭ pastavić. Ale doktar Uładzimir Martaŭ, jaki zahavaryŭ pra viciebskuju prablemu, akcentuje, što padača kisłarodu nie zaležyć ad taho, ci zahadčyk adździaleńnia reanimacyi apazicyjanier abo nie. Voś, jak jon apisvaje, što adbyłosia ŭ Viciebsku.
«U pačatku pieršaj chvali karanavirusa ŭ sakaviku 2020 hoda ŭ majoj Viciebskaj BCHMD u terminovym paradku mantavali kisłarodnyja punkty ŭ terapieŭtyčnym korpusie, vydzielenym dla lačeńnia karanavirusnych pacyjentaŭ. Było zmantavana bolš za 100 punktaŭ biez uliku adździaleńnia reanimacyi. My prajšli pieršuju chvalu bieź jakich-niebudź narakańniaŭ da sistemy padačy kisłarodu.
Z pačatkam druhoj chvali niešta zdaryłasia ź sistemaj padačy kisłarodu. Uvosień 2020 hoda my stracili šmat punktaŭ, jakija raniej pracavali biezdakorna. My pazbavilisia mahčymaści padklučać aparat štučnaj vientylacyi ŭ akušerskim korpusie — heta značyć tam, dzie da hetaha (jašče ŭ kastryčniku) vyratavali maładuju žančynu paśla kiesarava siačeńnia. Mahčymaści pašyreńnia adździaleńnia reanimacyi akazalisia abmiežavanyja.
Skazać, što administracyja BCHMD ničoha nie rabiła — niapraŭda. Dvojčy śpiecyjalisty ź Minska mianiali sistemu pieraklučeńnia kisłarodnych bałonaŭ (kožny raz heta była vajskovaja apieracyja), tema hučała, prablemu sprabavali vyrašyć…
I ŭsio adno zdaryłasia katastrofa 7-8 studzienia.
I da hetaha pieraboi z padačaj kisłarodu čas ad času pryvodzili da sumnych nastupstvaŭ. Ale ŭ tyja dni adbyŭsia maštabny zboj. Heta nadzvyčajnaje zdareńnie «zamiali». Moj zvarot da ministra Pinieviča mieŭ śledstvam majo zvalnieńnie. Dasłanaja kamisija Ministerstva achovy zdaroŭja nie vyvučała padziei, jakija adbylisia: jana praviarała, ci pravilna my lečym kavidnych pacyjentaŭ.
Pieraboi z padačaj kisłarodu pieryjadyčna zdarajucca i ciapier.
Dla pacyjentaŭ z krajniaj stupieńniu zaležnaści ad kisłarodu navat nievialiki pieraboj ciažka pieranieści. A ŭžo 20 chvilin!
Čaho varta było b — zaniacca prablemaj kantrolu za sistemaj padačy kisłarodu ŭ adździaleńni reanimacyi i intensiŭnaj terapii? U lubym chaładzilniku ź miedykamientami lažyć hraduśnik, miedsiostry viaduć časopis kantrolu tempieraturnaha režymu chaładzilnika.
Miž tym pacyjenty zastajucca ŭ zakładnikach nieprafiesijnych mieniedžaraŭ. Čarhovy zboj moža zdarycca ŭ luby dzień. Padača kisłarodu nie zaležyć ad taho, ci zahadčyk adździaleńnia reanimacyi apazicyjanier abo nie. Palityzacyja pytańnia — heta pra što?» — źviartajecca doktar Uładzimir Martaŭ.
Ciapier čytajuć
Hety małady biełarus stajaŭ la vytokaŭ ChatGPT. Voś što jon zrabiŭ2
Kamientary