U vydaviectvie «Januškievič» vyjšła hruntoŭnaja kniha pra rasstralanych u 1937 hodzie biełaruskich litarataraŭ
Vydańnie «(Nie)rasstralanyja» ŭtrymlivaje ŭ sabie historyi žyćcia, abranyja tvory i archiŭnyja zdymki biełaruskich paetaŭ i piśmieńnikaŭ, što byli represavanyja stalinskim režymam. Kniha vyjšła ŭ vydaviectvie «Januškievič» i 15 lutaha pastupaje ŭ prodaž.
Ciška Hartny, Vacłaŭ Łastoŭski, Michaś Čarot, Mojše Kulbak, Michaś Zarecki — usiaho vasiamnaccać asobaŭ. Niekatoryja materyjały, što ŭtrymlivajucca ŭ knizie, publikujucca ŭpieršyniu. Vydańnie źjaŭlajecca častkaj ahulnaha prajekta «(Nie)rasstralanyja», kudy ŭvachodziać taksama pieśni na vieršy zabitych paetaŭ dy kurs lekcyj. Usiaho ŭ pracy było zadziejničana kala šaścidziesiaci čałaviek.
«Prajekt pačaŭsia z adčuvańnia niepieražytaści traŭmy, jakuju atrymała naša hramadstva za vosiemdziesiat hadoŭ da hetaha. Taja rana nie toje, što nie zahaiłasia, jana praciahvała naryvać. My nie asensavali tyja padziei, nie pryniali ich, nie asudzili i nie zrabili vysnovy. Mienavita tamu stała mahčyma ŭsia hetaja papiaredniaja i dalejšaja žeść užo ŭ sučasnaj Biełarusi», — pisaŭ u fejsbuku aŭtar idei i adzin sa składalnikaŭ vydańnia Siarhiej Budkin.
Kniha vyjšła ŭ vydaviectvie «Januškievič». Paśla studzieńskaha vizitu DFR rachunki vydaviectva zabłakavanyja, tamu nadrukavać «(Nie)rasstralanych» atrymałasia dziakujučy padtrymcy partniora — vilenskaj drukarni Petro Ofsetas, jakaja dała adterminoŭku apłaty.
U prodaž «(Nie)rasstralanyja» vyjduć nakładam tolki sto ekzemplaraŭ.
Kamientary