U Hrodnie sudziać za hnomika ź bieł-čyrvona-biełym ściažkom u aknie. Abvinavačvajuć u adzinočnym pikiecie
U sudzie Kastryčnickaha rajona Hrodna sudziać Juryja Jaraša za dekaratyŭnaha hnomika z BČB-ściažkom u rukach. Fotazdymak vystaŭlenaha na aknie hnomika zrabiła Volha Bondarava. Žančyna viadomaja haradziencam tym, što ŭdzielničaje ŭ aŭtaprabiehach, padtrymlivaje supracoŭnikaŭ AMAPa na akcyjach i zafarboŭvaje bčb-simvoliku na vulicach horada, paviedamlaje s13.ru.
Zhodna sa składzienym pratakołam, Juryju Jarašu vystavili abvinavačvańnie ŭ praviadzieńni adzinočnaha pikietu. Sudovy praces viadzie sudździa Valeryj Špak.
Na sudzie abvinavačvany rastłumačyŭ, što ŭ toj dzień jaho žonka źviarnuła ŭvahu, što ŭpryhožvańnie na ich voknach fatahrafujuć dźvie žančyny.
— My nie asabliva nadali hetamu značeńnie, bo vokny ŭ nas zaŭsiody ŭpryhožany kazačnymi piersanažami, i mamy ź dziećmi časta spyniajucca, razhladajuć — my žyviom na pieršym paviersie. Ale žančyny byli bieź dziaciej, heta i źbiantežyła. Tady žonka vyjšła da ich i paznała siarod ich svaju byłuju adnakłaśnicu, — raspavioŭ na sudzie abvinavačany. — Z Bondaravaj jany vučylisia razam u škole. Jany pavitalisia, Volha sieła na rovar i źjechała.
Paźniej prybyŭ atrad milicyi i ŭziali tłumačeńnie ŭ haspadaroŭ taho samaha hnomika. Praź niekalki dzion da abvinavačanaha pryjšoŭ supracoŭnik milicyi i skłaŭ pratakoł.
U im paznačana, što mužčyna «na aknie vystaviŭ dla ahulnaha ahladu i publičnaj demanstracyi dekaratyŭnaha hnoma sa ściaham bieł-čyrvona-biełaha koleru, tym samym pravioŭ adzinočny pikiet».
— Siarod upryhožvańniaŭ byli i Santa-Kłaŭsy. A jany, jak viadoma, u bieła-čyrvonaj vopratcy. Čamu pryciahnuŭ uvahu mienavita hnomik, mnie nie zrazumieła.
Mužčyna prademanstravaŭ sudździ nievialiki BČB-ściažok, pamieram niekalki santymietraŭ, jaki byŭ u rukach u hnomika. Sud pacikaviŭsia, kali i dzie byŭ nabyty hnomik, chto daŭ jamu ŭ ruki ściažok.
— Užo i nie ŭspomniu. Stajaŭ hnomik u nas. My adznačali Novy hod, chtości z nas prymacavaŭ da hnomika ściažok. Chaču źviarnuć uvahu, što hnomik zaŭsiody stajaŭ la jełki na padłozie, ale ŭ toj dzień my jaje prybrali i časova pastavili cacku na padakońnik, — raspavioŭ mužčyna. Śviedka Volha Bondarava raspaviała na sudzie, što źjaŭlajecca arhanizataram akcyi «Antyvandał», mety jakoj — prybirać i zafarboŭvać bčb-simvoliku z vulic horada.
— Akcyja ŭzhodnienaja ź ideałahičnym adździełam administracyi horada. Kožny raz pierad vyjezdam my papiaredžvajem milicyju. U hety dzień było taksama, — patłumačyła na sudzie Bondarava. - My z kalehaj jeździli pa horadzie, šukali niezarehistravanuju simvoliku, kab jaje prybrać. Jana taksama raspaviała sudździ, što znajomaja z žonkaj abvinavačanaha.
— Vučylisia razam da 11 kłasa, ale z tych časoŭ bolš nie razmaŭlali.
U sudzie abvieščany pierapynak da zaŭtra — na sud nie źjaviłasia susiedka abvinavačanych, jakaja taksama prachodzić pa spravie śviedkaj.
Kamientary