Prezident Mižnarodnaj fiederacyi chakieja pryznaŭ, što ŭ Biełarusi amal niama šancaŭ pryniać čempijanat śvietu ŭ 2021 hodzie.
Dla pačatku Rene Fazel u intervju Sportchau rastłumačyŭ sutnaść jahonych fotazdymkaŭ z Alaksandram Łukašenkam i Dźmitryjem Baskavym.
«Maje sumiesnyja fotazdymki z Łukašenkam byli niapravilna patłumačanyja. Abmierkavańnie išło ŭ zusim inšym klučy — ja pryjechaŭ nie dla taho, kab vypić ź im harełki. Našaj metaj było znajści razam z Łukašenkam vyrašeńnie pytańnia», — skazaŭ Fazel.
Hienieralny sakratar IIHF Chorst Lichtnier, u svaju čarhu, dadaŭ, što im było harantavana, što fatahrafii nie patrapiać u presu.
Što tyčycca fatahrafij ź Dźmitryjem Baskavym, to, pa słovach Fazela, staršynia Biełaruskaj fiederacyi chakieja paprasiŭ jaho ab sumiesnym zdymku.
«Ja i vykazać zdahadku nie moh, što jon budzie vykładać ich u publičny dostup. U takich situacyjach razumieješ, što taboj manipulujuć», — adznačyŭ Fazel.
Dalej kiraŭnik IIHF raspavioŭ pra źmiest razmovy z Alaksandram Łukašenkam.
«My nie vyłučali nijakich patrabavańniaŭ, a tolki prapanoŭvali roznyja rašeńni situacyi. Bolšaść ź ich była pryniata. Taksama my zakranuli arhanizacyjnyja pytańni. Urešcie, my adpraŭlajemsia ŭ krainu, dzie na vulicy vychodziać sotni tysiač ludziej, tamu treba mieć harantyi biaśpieki. Być upeŭnienymi, što arena nie budzie abłožanaja. Hulcy, zaŭziatary, žurnalisty pavinny być u biaśpiecy.
Akramia hetaha, varta razumieć, što ŭ Biełarusi niekalki inšaje staŭleńnie da karanavirusa. Ale nas zapeŭnili, što padčas turniru buduć vykonvacca suśvietnyja standarty.
I, narešcie, my zakranuli palityčnyja pytańni. Ad apazicyi daviedalisia, što ŭ krainie 165 palitviaźniaŭ.
Z hetym pytańniem my źviarnulisia da Łukašenki, ale jon adrazu skazaŭ, što hetyja ludzi siadziać za parušeńnie zakona. Padčas demanstracyj šmat čaho adbyłosia. Milicyja napadała na ludziej, ale i z taho boku byli roznyja ŭčynki. Łukašenka skazaŭ, što adkazvaje za biaśpieku ŭ jaho krainie, što heta jaho praca i jon budzie jaje praciahvać.
Paśla hetaha my pierajšli da temy Kanstytucyi i vybaraŭ. Ale zrazumiejcie, jak IIHF my nie možam vyłučać palityčnych patrabavańniaŭ, tamu my prosta spračalisia. Nastolki kanstruktyŭna, nakolki heta ź im mahčyma.
My prylacieli, kab zrabić niešta dobraje. Ab čym my pavinny škadavać? My mahli b prosta napisać, ale zamiest hetaha pryjechali i skazali: «Alaksandr, u nas prablema». My prosta spartyŭnaja arhanizacyja, jakaja imkniecca vykanać svaju pracu — arhanizavać čempijanat śvietu ŭ Biełarusi, — skazaŭ Fazel.
Ciapier Rene Fazel vielmi nizka aceńvaje šancy pravieści čempijanat śvietu ŭ Minsku.
«Zrabić heta budzie vielmi, vielmi składana. Pavinny adbycca cud. Viadoma, my nie budziem prymać takoje rašeńnie na emocyjach. Ciapier mnie treba krychu adpačyć. Chorst ža zojmiecca analizam płana B», — skazaŭ Fazel.
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki2
Kamientary