Miascovym uładam dazvolili ŭvieści zbor za vyjezd za miažu na mašynie

U Biełarusi miascovym uładam dazvolili ŭvieści zbor dla tych, chto pierasiakaje miažu na mašynie. U jakaści abhruntavańnia pryvodzicca kansalidacyja vydatkaŭ biudžetu dla baraćby z COVID-19. Heta praduhledžana Zakonam «Ab źmienie Padatkovaha kodeksa», jaki byŭ apublikavany siońnia na Nacyjanalnym pravavym internet-partale. Pałažeńnie ab miascovym zbory ŭstupaje ŭ siłu siońnia, 1 studzienia, piša Tut.by.

Što za zbor?

Havorka idzie ab miascovym zbory za pierasiačeńnie dziaržaŭnaj miažy na mašynie praz punkty propusku.

Płacić zbor treba budzie, kali maksimalnaja masa transpartnaha srodku nie pieravyšaje 5 t i ŭ im majecca nie bolš za 8 miescaŭ dla siadzieńnia, akramia kiroŭcy. Pa sutnaści, heta tyčycca ŭsich lehkavych aŭtamabilaŭ.

I tak, płacić jaho treba budzie kožny raz pry vyjeździe za miažu.

Chto jaho ŭvodzić i jaki jaho pamier?

Uvodzić jaho buduć abłasnyja saviety deputataŭ na terytoryi adpaviednych rehijonaŭ. Takoje prava dajecca im na dva hady — z 1 studzienia 2021 hoda i da 1 studzienia 2023 hoda.

Staŭki zboru ŭstanaŭlivajucca abłasnymi Savietami deputataŭ, u tym liku ŭ zaležnaści ad maksimalna dazvolenaj masy transpartnaha srodku, u miežach 3 bazavych vieličyń (heta značyć 87 rubloŭ), niezaležna ad kolkaści pasažyraŭ u aŭtamabili.

Chto płacić, a chto — nie?

Płacić zbor budzie kiroŭca aŭtamabila da pierasiačeńnia miažy abo ŭ punkcie propusku. Norma raspaŭsiudžvajecca jak na mašyny fizičnych asob, tak i na aŭtamabili, jakija naležać IP i arhanizacyjam.

Nie treba budzie płacić zbor z transpartnych srodkaŭ kiraŭnikoŭ dziaržaŭ, uradaŭ, dypmisij, a taksama tym, chto jedzie na pachavańnie, lačeńnie (pry najaŭnaści paćviardžalnych dakumientaŭ). Vyzvalajucca ad vypłaty zboru invalidy 1-j i 2-j hrup, udzielniki VAV, likvidatary avaryi na ČAES, udzielniki spartyŭnych, kulturna-masavych i adukacyjnych mierapryjemstvaŭ (pry najaŭnaści dakumientaŭ).

A kali pajedzieš u Rasiju?

Pakolki ŭ dakumiencie skazana, što płacić zbor treba za pierasiačeńnie miažy ŭ punktach propusku, to zakranie jon tolki tych, chto jedzie ŭ Jeŭropu ci va Ukrainu. Jeździć u Rasieju možna budzie biez vypłaty zboru.

Płacić treba ŭžo zaraz?

Pakul nivodny z abłasnych Savietaŭ deputataŭ nie pryniaŭ rašeńnie ab uviadzieńni miascovaha zboru.

Rašeńni abłasnych Savietaŭ deputataŭ ab uviadzieńni zboru ŭstupajuć u siłu z 1-j daty miesiaca, što idzie za miesiacam ich aficyjnaha apublikavańnia. To bok, kali navat u najbližejšyja dni takoje rašeńnie budzie pryniata ŭ niejkaj vobłaści, to jano ŭstupić u siłu tolki z 1-ha lutaha.

Kali ž u niejkim rehijonie abłasny Saviet deputataŭ nie prymie rašeńnie ab pamiery staŭki zboru, to zbor budzie ličycca roŭnym nulu.

• 0
• 0
• 0
• 0
• 0
• 0
• 0
• 0