Uviečary 11 listapada ŭ «dvor Pieramienaŭ» na vulicy Čarviakova ŭ Minsku pryjechali ludzi ŭ maskach. Jany zrezali BČB-stužki i zafarbavali murał na transfarmatarnaj budcy. Paźniej MUS nazavie ich «nieabyjakavymi hramadzianami».
Miascovyja žychary aburylisia dziejańniami niaprošanych haściej. Siarod ich byŭ i 31-hadovy Raman Bandarenka, jaki pierad vychadam na vulicu paśpieŭ adpravić paviedamleńnie «Ja vychodžu!». U dvary jon skazaŭ niešta ŭ adras nieviadomych ludziej u maskach — tyja skrucili jaho i paciahnuli ŭ mašynu. U balnicu z Centralnaha RUUS chłopca pryvieźli toj ža nočču ź ciažkaj traŭmaj hałavy, u čaćvier jon pamior.
TUT.BY vyvučyŭ videazapisy i fotaśviedčańni i vyjšaŭ na asobu adnaho viadomaha spartsmiena.
Siarod kampanii «nieabyjakavych hramadzian», jakija pryjechali zrezać stužački, tady zaŭvažyli niekalki čałaviek, vielmi padobnych na členaŭ kamandy «zrazalnikaŭ stužačak», jakaja 18 kastryčnika była ŭ staličnym ŽK «Miehapolis». Tady, darečy, siarod «haściej «Miehapolisa» vidavočcy prykmiecili mužčynu, vielmi padobnaha da ciapierašniaha kiraŭnika fiederacyi chakieja Biełarusi Dźmitryja Baskava. I žychary «dvara Pieramienaŭ» raspaviali, što siarod «haściej» 11 listapada jany taksama bačyli mužčynu, vielmi padobnaha da taho, što na hetym zdymku z «Miehapolisa» znachodzicca źleva.
Pobač ź im i tady, i 11 listapada byŭ «nieabyjakavy hramadzianin» u šerym kaściumie i padšyvanaj kamizelcy. I spartsmien, da jakoha jon vielmi padobny, ščylna kantaktuje z Baskavym u spartyŭnym i nie tolki žyćci.
Mienavita hety mužčyna ŭ šerym kaściumie, miarkujučy pa videa z «dvara Pieramienaŭ», braŭ aktyŭny ŭdzieł u napadzie na Ramana Bandarenku.
Voś, naprykład, na videa čuvać: «Na ziamlu, bł***!» — i aŭtar videa pavaročvajecca na kryk. La turnika lažyć chłopiec uvieś u čornym (kapiušon takoha ž koleru), nad im staić mužčyna ŭ šerym kaściumie i padšyvanaj kamizelcy.
Hety čałaviek u šerym kaściumie i kamizelcy vielmi padobny da čempijona śvietu pa tajskim boksie i kikboksinhu Dźmitryja Šakuty. Ludzi, znajomyja ź im pa śviecie adzinaborstvaŭ, kažuć, što hołas na videa, vočy nad maskaj i taja častka tvaru, jakuju jana nie chavaje, vielmi padobnyja da hołasu i tvaru Šakuty.
Čamu tak možna mierkavać?
1. Adzieńnie
U Dźmitryja Šakuty jość takija ž spartyŭnyja štany i bajka z takoj ža emblemaj na rukavie.
Na levym rukavie hościa «Miehapolisa» možna zaŭvažyć uzor. Takaja ž kofta z malunkam na plačy była i ŭ čałavieka z «płoščy Pieramien» 11 listapada. Voś dva malunki (źleva — ŽK «miehapolis» 18 kastryčnika, sprava — «płošča Pieramien» 11 listapada).
Na Šakucie — firmovy kaścium jaho bajcoŭskaha kłuba Shock Team. Jak havorać blizkija da śvietu adzinaborstvaŭ ludzi, heta limitavanaja kalekcyja, dastupnaja ŭ adzinkavych ekzemplarach.
Dźmitryj Šakuta (sprava) pobač z eks-ministram unutranych spraŭ Iharam Šunievičam. Fota zroblena padčas motaprabiehu, uziata na Tribuna.com. Na baksiory taja ž bajka.
2. Abutak
Padčas bojki z Ramanam Bandarenkam na mužčynie ŭ šeraj spartyŭnaj vopratcy byli čornyja skuranyja krasoŭki ź biełaj padešvaj. Takija ž nosić (u spałučeńni, darečy, z takimi ž štanami) Dźmitryj Šakuta.
Što viadoma pra Dźmitryja Šakutu?
Kiruje ŭłasnym bajcoŭskim kłubam Shock Team.
Pracuje instruktaram pa śpiecpadrychtoŭcy śpiecnaza ŭ vajskovaj čaści 3214. Tam ža słužyŭ i zahinuły Raman Bandarenka. Ale, pa słovach tavaryšaŭ pa słužbie Ramana, jany nikoli nie pierasiakalisia z Šakutam ni pa słužbie, ni na treniroŭkach u čaści.
Ščylna kantaktuje ź Dźmitryjem Baskavym, hulaje pad jaho kiraŭnictvam u chakiej u kamandzie «Bastyjon» (tam ža hulajuć, naprykład, Viktar Łukašenka, načalnik DAI Biełarusi Dźmitryj Karziuk i inš.), udzielničaje ŭ praŭładnych aŭtaprabiehach.
Uvachodzić u bajkierski kłub Iron Birds Chapter — heta mižnarodnaja arhanizacyja amataraŭ matacykłaŭ Harley-Davidson z krain SND, kudy ŭvachodziać, naprykład, starejšy syn Alaksandra Łukašenki Viktar, eks-ministr unutranych spraŭ Ihar Šunievič, načalnik UDAI MUS Dźmitryj Karziuk, syn byłoha rasiejskaha hienprakurora Arciom Čajka i inš.
Pierad vybarami vyklikaŭ na boj viadomaha restaratara Vadzima Prakopjeva, jaki pierad tym zaprasiŭ na rynh Alaksandra Łukašenku.
— Vadzim Prakofjeŭ (jon mieŭ na ŭvazie Prakopjeva. — zaŭv. TUT.BY), ty vyklikaŭ na rynh prezidenta. Spačatku sustreńsia ŭ bai sa mnoj, — skazaŭ tady Šakuta ŭ Instagram.
Što kaža sam Šakuta?
TUT.BY nie ŭdałosia atrymać kamientar Dźmitryja Šakuty: spartoviec nie adkazvaje na zvanki.
Spartovaje vydańnie Tribuna.com dazvaniłasia da jaho, ale razmova vyjšła vielmi karotkaj.
Žurnalisty spytali, ci znachodziŭsia Šakuta ŭviečary 11 listapada ŭ rajonie «płoščy Pieramien» razam ź Dźmitryjem Baskavym.
— Čaho? Kamientary niejkija niešta davać? Artykuł pisać [budziecie]?
Pramoviŭšy heta, bajec paviesiŭ trubku.
Dźmitryj Šakuta naradziŭsia ŭ Miensku ŭ 1980 hodzie. Bajec vystupaŭ na amatarskim i prafiesijnym uzroŭniach u dvuch stylach — tajski boks i kikboksinh. Jon stanaviŭsia čempijonam śvietu ŭ roznych viersijach i vahavych katehoryjach. Prafiesijnuju karjeru Šakuta zaviaršyŭ u 2013 hodzie, majučy ŭ kikboksinhu suadnosiny vyjhranych i prajhranych bajoŭ 78:13.
Ciapier čytajuć
Vyśvietlili, dzie adbyvaŭsia «dopyt» kalinoŭca Vasila Hračychi9
Kamientary