«Zhvałcić u aŭtazaku nielha». Milicejski čynoŭnik nazyvaŭ fejkam śviedčańni pra zhvałtavańnie dubinkaj
Mižnarodnaja pravaabarončaja arhanizacyja Human Rights Watch zaklikaje AAN i ABSŽ nieadkładna pačać rasśledavańni faktaŭ hvałtu z boku siłavikoŭ padčas kampanii prezidenckich vybaraŭ u Biełarusi.
Jak vynikaje z admysłovaha dakłada, pravaabaroncy sabrali śviedčańni zatrymanych pra źbićcio i katavańni, niekatoryja vypadki vychodziać za miežy razumieńnia.
Pra zhvałtavańnie dubinkaj zajaviŭ 30-hadovy prahramist. Jon byŭ zatrymany ŭ centry Minska 11 žniŭnia, a hvałt, ź jahonych słoŭ, učyniŭ staršy supracoŭnik AMAP u milicejskaj mašynie. Heta małady čałaviek paćvierdziŭ miedycynskimi dakumientami, dzie havaryłasia ab zafiksavanych u jaho hiematomach mašonki, zadniaha prachodu, a taksama čerapna-mazhavoj traŭmie i strasieńni mozhu.
«Amapaŭcy patrabavali razbłakavać telefon. Ja admoviŭsia. Paklikali starejšaha. Jon staŭ pahražać — dubinku ŭ azadak zasunu. Potym razrezaŭ mnie šorty i trusy zzadu, kryž-nakryž, kryknuŭ svaim, ci jość u kaho preziervatyŭ. Ja lažaŭ na padłozie tvaram uniz, ale bačyŭ, jak jon preziervatyŭ naciahvaje na dubinku. I jon zasunuŭ mnie dubinku ŭ zadni prachod. Vyciahnuŭ, znoŭ zapatrabavaŭ parol. Biŭ kułakami i nahami — pa rebrach, pa tvary, u zuby…»
U Ministerstvie ŭnutranych spraŭ zajavu ab zhvałtavańni milicyjantami nazvali «fejkam».
«Mahu z usioj adkaznaściu zajavić, što niama nivodnaha vyjaŭlenaha fakta zhvałtavańnia z boku supracoŭnikaŭ milicyi», — skazaŭ 16 vieraśnia padčas pres-kanfierencyi pieršy namieśnik ministra ŭnutranych spraŭ Hienadź Kazakievič. — Infarmacyja ab tym, što mieli miesca zhvałtavańni, zvyčajny fejk. Zhvałcić u aŭtazaku nielha», — pierakanany milicejski čynoŭnik, piša «Radyjo Svaboda».
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna3
Kamientary