Pravaabaronca pra abmiežavańni naziralnikaŭ: Vybary pierajšli ŭ stadyju śpiecapieracyi
U CVK na svaim pasiadžeńni 22 lipienia abmierkavali pytańnie z abmiežavańniem kolkaści naziralnikaŭ va ŭčastkovych vybarčych kamisijach, źviazaŭšy heta z pandemijaj karanavirusa.
Jak adznačyła siońnia staršynia CVK Lidzija Jarmošyna, padčas daterminovaha hałasavańnia siabry vybarkamaŭ znachodziacca ŭ ciesnych pamiaškańniach, a ciapier praciahvajecca epidemija karanavirusa, a za imi nazirajuć naziralniki, jakija nibyta «kamandujuć, što im rabić». U Niamieččynie, raskazała jana, pryhrazili zabaranić pravodzić vybary, bo pamiaškańnie nie adpaviadaje normam sacyjalnaha dystancyjanavańnia.
Jarmošyna prapanavała ŭ asnoŭny dzień hałasavańnia, 9 žniŭnia, pamienšyć kolkaść naziralnikaŭ da piaci adnačasova i nie bolš za 50% ad składu kamisii, padčas daterminovaha hałasavańnia, ahułam — nie bolš za try adnačasova. Pryjarytet buduć mieć tyja naziralniki, chto akredytavaŭsia raniej.
Kaardynatar kampanii «Pravaabaroncy za svabodnyja vybary» Uładzimir Łabkovič zajaviŭ, što vybary zhubili svaje apošnija atrybuty vybarčaj kampanii:
«Siońniašniaje rašeńnie CVK — heta faktyčna poŭnaje pierakreślivańnie ŭžo apošnich vybarčych pracedur u krainie. Heta piarečyć pryncypu hałosnaści, jaki praduhledžany art. 13 Vybarčaha kodeksa. Ciapier ułady pravodziać vybary sa svaimi vybarčymi kamisijami i svaimi naziralnikami, a pry takoj struktury niemahčyma naohuł kazać ni pra jakija standarty svabodnych, spraviadlivych i demakratyčnych vybaraŭ.
Prykra, što Jarmošyna prykryvajecca instrukcyjaj Ministerstva achovy zdaroŭja, byccam by dbajučy pra zdaroŭje ludziej, ale ŭ inšym jana nie chitryć, bo ŭsie jany bajacca maralnaha cisku na siabroŭ UVK. Ciažka falsifikavać vybary, kali za taboj sočać tak šmat ludziej. Heta adkaz na tuju aktyŭnaść hramadstva i žadańnie nazirać za vybarami. Ułady bajacca luboj hramadskaj aktyŭnaści i adkazvajuć na heta svaimi zvykłymi mietadami.
Spačatku ŭłady zakryli UVK da 24 lipienia, nie pravodziačy pracu pa akredytacyi naziralnikaŭ, zatym praz čorny ŭvachod napampavali ŭčastki svaimi fejkavymi naziralnikami z praŭładnych arhanizacyj, a zatym zrabili farmalnaść u vyhladzie siońniašniaha rašeńnia.
Faktyčna vybary zhubili svaje apošnija atrybuty vybarčaj kampanii i pierajšli ŭ stadyju śpiecapieracyi pa zachavańniu status-kvo ŭ krainie».
Ciapier čytajuć
Anžalika Mielnikava paśla źniknieńnia nabyła dźvie kvatery ŭ Minsku80
Kamientary