Padčas pasiadžeńnia Centralnaj vybarčaj kamisii 22 lipienia Lidzija Jarmošyna, spasłaŭšysia na składanuju epidemijałahičnuju abstanoŭku, prapanavała źmienšyć kolkaść naziralnikaŭ na ŭčastkach, piša Tut.by.
Kiraŭnik CVK nahadała pra toje, što, niahledziačy na palapšeńnie situacyi z karanavirusam, jana ŭsio roŭna praciahvaje vyklikać naściarožanaść.
Jana spasłałasia na źviestki Ministerstva achovy zdaroŭja, zhodna ź jakimi kala 41 tysiačy biełarusaŭ źjaŭlajucca kantaktami pieršaha ŭzroŭniu albo zaražanyja COVID-19 i znachodziacca na karancinie — i heta nie ŭličvajučy tych, chto ciapier u balnicach.
— Ja razumieju, što heta budzie niepapularnaje rašeńnie, ale prapanuju na pieryjad hetaj elektaralnaj kampanii pamienšyć kolkaść naziralnikaŭ.
Da piaci čałaviek — u asnoŭny dzień hałasavańnia. A ŭ dni daterminovaha hałasavańnia da troch.
Člen CVK z pravam daradčaha hołasu Pavieł Dzik zadaŭ pytańnie Lidzii Jarmošynaj, ci jość sens u takim rašeńni z ulikam taho, što padčas vybaraŭ praz učastak prachodzić vialikaja kolkaść ludziej.
— Prachodnaść i znachodžańnie ŭ adnym pamiaškańni — roznyja rečy — paryravała kiraŭnik CVK. — I heta biaśpieka nie tolki siabraŭ kamisii, ale i naziralnikaŭ, jakija znachodziacca tam pastajanna. Tak, buduć pravietryvańnia i ŭborki, ale nielha ž spynić praces hałasavańnia dla niejkich pravietryvańniaŭ i ŭborak. I potym chaču padkreślić,što i epidemijałahičnaja abstanoŭka, i taja fizičnaja i maralnaja, jakaja nieabchodnaja členam učastkovych vybarčych kamisij, kab jany nie adčuvali maralnaha, emacyjnaha i fizičnaha cisku — jana im prosta nieabchodnaja.
Rašeńnie było pryniata adnahałosna.
Pa ŭčorašnich źviestkach, ciapier zarehistravana 42 856 naziralnikaŭ, pry tym što kolkaść učastkaŭ u hetym hodzie składaje 5767, vychodzić, što na kožny ŭčastak možna raskidać ŭžo amal pa siem z pałovaj naziralnikaŭ. Uličvajučy, što naziralnikaŭ buduć vybirać zychodziačy z taho, chto pieršy atrymaŭ akredytacyju, kala traciny naziralnikaŭ užo nie patrapiać na ŭčastki ŭ asnoŭny dzień hałasavańnia.
Jość padstavy mierkavać, što ŭ lik dapuščanych naziralnikaŭ trapiać najbolš ludzi ad BRSM, Fiederacyi prafsajuzaŭ, Sajuza žančyn, Sajuza vieteranaŭ dy inšych prałukašenkaŭskich ci kantralavanych uładami arhanizacyj i partyj.
***
Pavodle aficyjnych źviestak, u Biełarusi za ŭvieś čas zafiksavali 66 348 vypadkaŭ karanavirusa, ale ŭžo vypisanyja 58 592 čałavieki, u ciapierašni čas chvarejuć 7 249 čałaviek.
Kamientary