«Pasadzim ciabie potym». Aktyvistu ŭ Viciebsku dali 10 sutak, a potym niečakana vyzvalili
Sud Kastryčnickaha rajona Viciebska 7 lipienia prysudziŭ aktyvistu Uładzimiru Kijko 10 sutak. Paśla hetaha jaho adrazu advieźli ŭ Centr izalacyi pravaparušalnikaŭ adbyvać aryšt, ale nieŭzabavie vyzvalili, paviedamlaje spring96.org.
Cud adbyvaŭsia ŭ anłajn-režymie (praz Skype-videasuviaź). Sudździa Uładzimir Carykaŭ paličyŭ Kijko vinavatym u č. 3 art. 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ paŭtorna ciaham hoda) — za ŭdzieł u Łancuhu salidarnaści 19 červienia. Pratakoł skłaŭ učastkovy, staršy lejtenant Vital Pralič.
Uładzimir Kijko svajoj viny nie pryznaŭ. Jon zajaviŭ na sudzie, što braŭ udzieł u całkam lehalnym pikietavańni dla zboru podpisaŭ, bo źjaŭlajecca siabram inicyjatyŭnaj hrupy Śviatłany Cichanoŭskaj.
Paśla abviaščeńnia rašeńnia suda Uładzimira Kijko źmiaścili adbyvać aryšt u viciebski IČU, dzie jon pavinien byŭ znachodzicca da 16 lipienia. Ale aktyvist paśpieŭ tam prabyć zusim niadoŭha:
«Niedzie praz hadzinu paśla suda pa skajpie da mianie ŭ IČU pryjechaŭ milicyjant Vital Pralič, jaki składaŭ na mianie pratakoł, i skazaŭ, što ja volny. Ja ździviŭsia. A jon kaža: «Pasadzim ciabie potym», — raskazaŭ Kijko.
Ciapier jon na voli, ale 9 sutak aryštu zastajucca nieadbytymi — z ulikam taho, što adny sutki jon pravioŭ u IČU ŭ čakańni suda paśla taho, jak jaho zatrymali 6 lipienia.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały3
Kamientary