Bujny maštab epidemii karanavirusa COVID-19 ŭ Italii tłumačycca tym, što virus trapiŭ u krainu jašče ŭ pačatku zimy, ale vyjavić jaho na rańnich stadyjach pieraškodziła ŭspyška hrypu. Pra heta ŭ intervju rbc.ru zajaviŭ kiraŭnik departamienta infiekcyjnych zachvorvańniaŭ u italjanskim Najvyšejšym instytucie zdaroŭja, navukovy daradca ŭrada Italii Džavani Reca.
«U bolšaści vypadkaŭ COVID-19 praciakaje ŭ pacyjentaŭ u lohkaj formie, i tamu jaho simptomy lohka zbłytać ź simptomami hrypu. Tolki kali my pačali sutykacca ź ciažkimi vypadkami, jakija supravadžajucca pnieŭmanijaj, stała zrazumieła, što my majem spravu z čymści inšym», — skazaŭ jon.
Reca vykazaŭ zdahadku, što virus moh patrapić u Italiju jašče ŭ siaredzinie studzienia, adnak pieršy aficyjny vypadak zachvorvańnia byŭ vyjaŭleny 20 lutaha.
Italija — treciaja pa liku dyjahnastavanych vypadkaŭ zachvorvańnia kraina ŭ śviecie (amal 200 tys., adstaje ad ZŠA i Ispanii). U apošni tydzień ułady fiksujuć źnižeńnie tempaŭ pašyreńnia virusa ŭ krainie.
26 krasavika ŭłady krainy abviaścili ab źniaćci častki abmiežavańniaŭ z 4 maja i pierachodzie da «druhoj fazy» baraćby z epidemijaj. U pryvatnaści, buduć adčynienyja parki, a restarany zmohuć pradavać ježu na vynas. Pad zabaronaj zastanucca masavyja mierapryjemstvy i mnohija hramadskija miescy.
Vierahodna, što da narmalnaha žyćcia ŭ Italii i inšych krainach ludzi zmohuć viarnucca tolki sa źjaŭleńniem vakcyny, na raspracoŭku jakoj moža syści hod, kali nie bolš, ličyć Reca. Da hetaha momantu hramadzianam pryjdziecca vykonvać miery zaściarohi, u tym liku trymać sacyjalnuju dystancyju.
Ciapier čytajuć
Łukašenka zajaviŭ pra hatoŭnaść pryjechać u Kijeŭ42
Kamientary