Kolkaść pnieŭmanij u Maskvie ŭ studzieni vyrasła na 1860. Ułady: «Nie źviazana z karanavirusam»
Tryvohu zabiła kiraŭnica niezaležnaha prafsajuza miedrabotnikaŭ Rasii Anastasija Vasiljeva. Rasstat zafiksavaŭ rost vypadkaŭ pnieŭmanii ŭ Maskvie ŭ studzieni z 5058 u 2019 hodzie da 6921 u 2020-m.
Pry hetym niama nijakich vidavočnych padstaŭ dla takoha rostu. Siezonnaja epidemija VRVI i hrypu hetaj zimoj była słabaja, bo nadvorje trymałasia stabilna ciopłaje. A ŭ cełym pa Rasii kolkaść pnieŭmanij zastavałasia na ŭzroŭni minułaha hoda.
Ci nie źviazany studzieński skačok pnieŭmanij u Maskvie z kitajskim karanavirusam, jaki mienavita ŭ studzieni pačaŭ raspaŭsiudžvańnie pa śviecie? Mienavita Maskva maje ciesnyja kamiercyjnyja suviazi z Kitajem, u Maskvie znachodziacca hihanckija hurtovyja i roźničnyja rynki, jakija zabiaśpiečvajucca pradukcyjaj z Kitaja.
Pryznać hety fakt — było b raŭnaznačna pryznańniu, što ŭ Rasii pramarhali pieršuju chvalu karanavirusa. Virus z Maskvy nie moh nie trapić u Biełaruś, źviazanaj z rasijskaj stalicaj dziasiatkami ciahnikoŭ i avijarejsaŭ.
Miedyčnyja ŭłady Maskvy abviarhajuć: heta inšyja pnieŭmanii, z karanavirusam nie źviazanyja. Bolš za toje, ułasnaja statystyka maskoŭskaha ŭpraŭleńnia achovy zdaroŭja i rostu nie fiksuje, a naadvarot, naziraje źnižeńnie adpaviedna na 8% i 7% proci minułaha hoda. Heta byŭ prosta statystyčny zboj u sistemie Rasstata.
Atmaśfiera niedavieru charakternaja nie tolki dla Rasii, ale i dla inšych aŭtarytarnych i dyktatarskich režymaŭ. Ludzi bajacca, što ŭłady ŭ hetych krainach dumajuć nie stolki pra minimizacyju maštabaŭ epidemii, kolki pra toje, kab statystyka vyhladała lepš, čym u inšych krainach.
Padazreńnie ŭ navukoŭcaŭ vyklikała taksama statystyka ŭ Iranie i Kitai.
Usiaho pa stanie na 20 sakavika ŭ śviecie ad karanavirusa pamierła bolš za 11 tysiač čałaviek. Śmiarotnaść asabliva vysokaja ŭ ludziej, starejšych za 60 i, asabliva, za 80 hadoŭ. Mužčyny pamirajuć udvaja čaściej za žančyn, vyjavili epidemijołahi na asnovie analizu statystyki Kitaja.
Druhaja chvala karanavirusa prymusiła rasijskija ŭłady pastavicca da jaho ŭsurjoz. Rasija zakryła svaje miežy, infarmacyja pra chvarobu vyjšła na pieršyja staronki rasijskich ŚMI.
Kamientary