Na prajmieryz zarehistravanyja piaciora kandydataŭ: Pavieł Sieviaryniec, Juraś Hubarevič, Mikałaj Kazłoŭ, Alaksiej Janukievič i Volha Kavalkova.
Pra heta na pres-kanfierencyi ŭ Minsku paviedamiŭ pieršy namieśnik staršyni BSDP Alaksiej Sihajeŭ, jaki vykonvaje abaviazki kiraŭnika štaba pa vyłučeńni adzinaha kandadyta.
Hanna Kanapackaja nie zarehistravanaja ŭ jakaści kandydata. Suprać jaje vykazałasia AHP, a taksama BSDP, a dla rehistracyja patrebna było adzinahałosnaje rašeńnie AHP, Partyi BNF, Ruchu «Za Svabodu», BCHD i BSDP.
Pra toje, što Kanapackaja nie budzie zarehistravanaj kandydatkaj, «NN» pisała jašče ŭčora. Pryčynaj nierehistracyi Kanapackaj nazvali nieadpaviedna aformlenyja dakumienty. Sihajeŭ paviedamiŭ, što siarod 224 podpisaŭ byŭ 41 podpis, jaki nie całkam adpaviadaŭ normam.
«Vykazvańni Hanny Kanapackaj nie byli nakiravanyja na ŭmacavańnie davieru. Hanna Anatoljeŭna ŭ svaich zvarotach sprabavała na nas cisnuć i kazała, što pakidaje za saboj prava źviarnucca ŭ dziaržorhany, kab jany pravieryli dziejnaść kamisii», — skazaŭ Sihajeŭ.
Kanapackaja atrymaje nazad 500 jeŭra, jakija ŭnosiła dla taho, kab stać adzinym, a taksama ŭsie inšyja dakumienty, jakija jana padavała dla rehistracyi.
U chutkim časie zarehistravanyja kandyty atrymajuć paśviedčańni.
Hałasavańnie ŭ rehijonach budzie adbyvacca z 4 sakavika da 15 maja. Za hety čas pretendenty majuć naviedać 56 haradoŭ. Sustrečy buduć adbyvacca pa aŭtorkach, piatnicach, subotach i niadzielach.
Pieršaja sustreča adbudziecca 6 sakavika ŭ Haradku a 17:30. Na nastupny dzień sustrečy ŭ Viciebsku i Navapołacku. Ludziej prosiać prychodzić z pašpartami.
Internet-płatforma dla hałasavańnia za adzinaha pakul što nie zapuščanaja, jaje płanujuć zapuścić ciaham tydnia. Sprava ŭ tym, što sajt byŭ padrychtavany na šaści kandydataŭ, a ciapier budzie piaciora, tamu daviadziecca vypravić hetuju niedakładnaść.
U Minsku zapłanavanyja try sustrečy: adna projdzie napiaredadni Dnia Voli, druhaja — «Čarnobylskaja šlachu», treciaja — 12 maja.
Kiraŭnik Partyi BNF Ryhor Kastusioŭ skazaŭ, što Mikoła Statkievič całkam maje prava na svaju stratehiju. «Što z hetaha atrymajecca — pabačym», — skazaŭ jon.
Kamientary