Šeść apazicyjnych partyj damovilisia nakont adzinaha kandydata. Hubarevič ci Sieviaryniec?

U paniadziełak, 27 studzienia, u hateli Crowne Plaza (Kirava, 13) projdzie pres-kanfierencyja lidaraŭ apazicyjnych partyj, jakija damovilisia pamiž saboj adnosna vyłučeńnia adzinaha kandydata na prezidenckija vybary — 2020.

Pavialičyć

Prymuć udzieł Juraś Hubarevič (Ruch «Za Svabodu»), Vital Rymašeŭski (BCHD), Ihar Barysaŭ (BSDP), Ryhor Kastusioŭ (BNF), Mikałaj Kazłoŭ (AHP). Taksama ŭ pracesie vyłučeńnia adzinaha budzie ŭdzielničać partyja «Zialonyja», kiraŭnikom jakoj byŭ niadaŭna abrany Dźmitryj Kučuk.

U paniadziełak pavinny być ahučany miechanizm taho, jak budzie abiracca adziny kandydat. Pakul palityki trymajuć heta ŭ strohaj sakretnaści. Pamiž saboj jany damovilisia, što toj, chto «salje» infarmacyju ŭ ŚMI, budzie vymušany zapłacić štraf u pamiery 500 jeŭra.

Palityki abiacajuć, što pracedura vyznačeńnia adzinaha budzie adbyvacca publična i adkryta, a nie kułuarna. To bok pryniać udzieł u vyznačeńni zmohuć mnohija, a nie tolki lidary partyj za začynienymi dźviarami.

Na hety momant svajo žadańnie ŭdzielničać u vybarach abviaścili lidar Ruchu «Za Svabodu» Juraś Hubarevič, sustaršynia BCHD Pavieł Sieviaryniec, kiraŭnik AHP Mikałaj Kazłoŭ, namieśnik staršyni Partyi BNF Alaksiej Janukievič, a taksama pradstaŭnica BCHD Volha Kavalkova.

Kazus u historyi Kavalkovaj u tym, što jaje kandydaturu nie padtrymała navat BCHD, vyłučyŭšy Sieviarynca. Mahčyma, situacyja vyrašycca ŭ bližejšuju niadzielu, kali źbiarecca nacyjanalnaja rada BCHD.

Sacyjał-demakraty pakul nie vyłučali svajho pradstaŭnika kandydatam na vybary. Isnuje nievialikaja vierahodnaść, što heta budzie zroblena ŭ bližejšyja dni, bo na niadzielu pryznačana pasiadžeńnie centralnaha kamiteta partyi. «Zialonyja» na źjeździe vyrašyli, što nie buduć vyłučać svajho kandydata, adnak adzin z kiraŭnikoŭ partyi skazaŭ «NN», što naŭrad ci jany praminuć takuju mahčymaść «prapijarycca i paściabacca».

Što tyčycca ŭžo isnujučych kandydataŭ, to, pavodle źviestak «NN», najbolšyja šancy być abranym adzinym kandydatam na siońnia ŭ Paŭła Sieviarynca i Jurasia Hubareviča. Sieviaryniec maje lepšuju padtrymku siarod prostych aktyvistaŭ, a voś Hubarevič maje lepšyja raskłady miž kiraŭnikami struktur.

«NN» stała viadoma, što Biełaruski nacyjanalny kanhres Mikoły Statkieviča nie budzie prymać udzieł u vyznačeńni adzinaha. Heta značyć, što ŭdzieł nie buduć prymać i «Jeŭrapiejskaja Biełaruś», i prafsajuz REP, i «Narodnaja Hramada», a taksama inšyja drabniejšyja arhanizacyi.

Lidar partyi «Spraviadlivy śviet» Siarhiej Kalakin paviedamiŭ, što jaho nie zaprašali ŭdzielničać u hetaj pracedury. Sam jon ličyć biessensoŭnym vyłučeńnie adzinaha kandydata, jak i ŭvohule ŭdzieł u vybarach. «Kolki my možam taptacca pa adnych i tych ža hrablach», — adznačyŭ Kalakin.

Nie zaprašali da ŭdziełu i kampaniju «Havary praŭdu». «My ŭžo daŭno pryniali rašeńnie, što budziem vyłučać svajho ŭłasnaha kandydata, — kaža kiraŭnik «HP» Andrej Dźmitryjeŭ. — Kali ad niekalkich apazicyjnych siłaŭ budzie abrany adziny — heta dobra. Naša ahulnaja meta — pieramieny».

Prezidenckija vybary pavinny adbycca ŭ 2020 hodzie, nie paźniej za žnivień.

Apytanka

• 0
• 0
• 0
• 0
• 0
• 0
• 0
• 0