U Rahačovie sud vynies rašeńnie pa spravie mužčyny, jaki kinuŭ u adras padletka: «Ty jašče nie zdoch?»

Sud u Rahačovie razhledzieŭ pratakoł, składzieny na 42-hadovaha Dźmitryja, jaki abraziŭ 13-hadovaha Daniłu. Sud za vyraz «Ty jašče nia zdoch, ščaniuk?» u bok małaletniaha pakaraŭ mužčynu štrafam u pamiery 5 bazavych vieličyń (127 rubloŭ), piša Radyjo Svaboda.

Dźmitry 29 kastryčnika viarnuŭsia paśla adbyćcia pakarańnia na «chimii» za źbićcio Daniły na spartovaj placoŭcy. Letaś na hetaj placoŭcy ŭ Rahačovie ŭźnik kanflikt. Dzieci hulali ŭ futboł. Umiašalisia darosłyja. Byŭšy napadpitku, Dźmitry nakinuŭsia na 12-hadovaha Daniłu i źbiŭ jaho. Da hetaha jon pahražaŭ Daniłu hvałtam, łajaŭsia. Eksperty naličyli «nia mienš za vosiem miescaŭ prykładańnia traŭmavalnaj siły».

U lutym sud pakaraŭ Dźmitryja «chimijaj» na paŭtara hoda za chulihanstva. Jon trapiŭ pad amnistyju i 29 kastryčnika vyzvaliŭsia. Baćki Daniły nia viedali pra heta.

«1 listapada syn pajšoŭ u kramu pa pradukty i viarnuŭsia sam nia svoj. Kaža: «Mama, u mianie niepryjemnaści». Jon raskazaŭ, što sa śpiny da jaho padyšoŭ Šaŭčenka i skazaŭ: «Ty jašče nia zdoch, ščaniuk?» Kažu, što nia moža takoha być, jon ža na «chimii». Ale patelefanavała ŭ milicyju, paśla na «chimiju» i daviedałasia, što jon vyzvaliŭsia pa amnistyi», — raskazała Natalla, maci Daniły.

Milicyja skłała administracyjny pratakoł za abrazu.

42-hadovy Dźmitryj u sudzie admaŭlaŭ svaju vinu. Jon kazaŭ, što sapraŭdy byŭ u kramie 1 listapada — nabyvaŭ morkvu i cybulu. Da małaletniaha nie padychodziŭ, ničoha jamu nie kazaŭ i navat nie paznaŭ Daniłu. Razam z tym 28 listapada jon davaŭ pakazańni milicyi, što paznaŭ Daniłu, ale ničoha nie kazaŭ jamu.

U sudzie prahledzieli videa z kamery nazirańnia ŭ kramie. Na zapisie vidać, jak paŭz Daniłu prachodzić Dźmitry, hladzić na školnika i niešta kaža ŭ hety momant. «Vusny ŭ vas varušacca», — zaŭvažyła sudździa. «Mimiku nichto nie admianiaŭ», — adreahavaŭ žychar Rahačova.

Paśla pasiedžańnia ŭ kamentary žurnalistam Dźmitry tłumačyŭ, što niešta marmytaŭ sabie pad nos — mahčyma, nahadvaŭ sabie, što «morkvu kupiŭ, cybulu kupiŭ». «Kali idzieš u kramu, to, kab nie zabycca pra pakupki, havoryš sam z saboj», — dadaŭ Dźmitry.

Pavialičyć

Dapytali ŭ sudzie i školnika.

— Hetaja fraza prynižała tvaju hodnaść i honar?

— Tak.

— Jana prahučała ŭ prynižalnaj formie?

— Ale.

— Ci možaš svaje pačućci pieradać?

— Strach.

Maci školnika pradstaŭlała jahonyja intaresy ŭ sudzie. Jana nahadała, što Dźmitry 29 kastryčnika vyzvaliŭsia, ale nie raskajaŭsia, bo ŭžo 1 listapada pahražaŭ žyćciu jaje syna. «Kali jaho sudzili za źbićcio Daniły, vystupali śviedkami 15 čałaviek, u asnoŭnym dzieci. Jon kazaŭ na sudzie, što ŭsie jany chłusiać, nie pryznavaŭ svajoj viny», — zaznačyła Natalla.

«Ludzi pačali prosta zajmacca zarablańniem hrošaj. Ja nia vieru nivodnamu słovu, jakoje kaža ich syn. Ja napisaŭ chadajnictva, kab psycholah pravioŭ ź im apytańnie i vyznačyŭ, chłusić chłopiec ci nie. Voś baćki prosiać, kab ich syna achavali ad mianie. Dyk prabačcie — my nie ŭ Amerycy žyviom, a ŭ adnym dvary», — vykazaŭsia Dźmitry.

Sud pryjšoŭ da vysnovy, što padstaŭ nie daviarać pakazańniam małaletniaha niama, bo Daniła ŭ dzień incydentu adrazu raskazaŭ usio maci, jany źviarnulisia ŭ milicyju, zapatrabavali zapis z kamery nazirańnia ŭ kramie. Na zapisie vidać, što Dźmitry pavaročvaŭ hałavu ŭ bok Daniły. Sud pryznaŭ, što fraza «Ty jašče nia zdoch, ščaniuk» «mieła miesca».

«Nia viedaju, ci zadavolenyja my rašeńniem sudu, mahli b i bolš dać štrafu. Ale što rabić dalej? My baimsia za syna, za toje, jak jamu na vulicu chadzić. Nia budzieš ža jaho doma trymać! A toj vypje — i chto viedaje, što jamu pryjdzie ŭ hałavu», — razvažaje maci Daniły.

Ale raptam na hanak sudu vychodzić Dźmitry i kidaje ŭ bok žurnalistaŭ i baćkoŭ Daniły: «Heta nie kaniec! Heta tolki pačatak!». «Tolki pasprabuj jašče raz padydzi da našaha syna», — reahuje Natalla.

• 0
• 0
• 0
• 0
• 0
• 0
• 0
• 0