29 žniŭnia vydaŭsia nasyčanym dniom dla Alaksandra Łukašenki. Spačatku jon sustreŭsia z Džonam Bołtanam, pamočnikam Trampa. A paśla zaniaŭsia zboram kavunoŭ u atačeńni pryhožych dziaŭčat.
«Naša Niva» pacikaviłasia, chto sioleta ŭvajšoŭ u «žanočy kavunovy bataljon».
Nie abyjšłosia biez užo zvykłych tvaraŭ. U zbory kavunoŭ pryniali ŭdzieł daŭnija spadarožnicy Łukašenki: jaho pres-sakratarka Natalla Ejsmant, supracoŭnica słužby pratakoła Darja Šmanaj i himnastka Ksienija Sankovič.
Ich niaredka možna pabačyć na roznych mierapryjemstvach pobač z kiraŭnikom dziaržavy. Ciapier voś Natalla Ejsmant u cišotcy, pryśviečanaj Jeŭrapiejskim hulniam, łović kavuny, stojačy na borcie pryčepa.
Taksama dapamahała źbirać kavuny Marta Hołubieva — aktrysa Kupałaŭskaha teatra.
Na zdymku Marta Hołubieva — sprava, u biełaj cišotcy.
Joj 29 hadoŭ. Na jaje rachunku bolš za 10 teatralnych rolaŭ, bolš za 20 rolaŭ u kino.
Ale pieršasnuju viadomaść Hołubieva nabyła nie praz tvorčaść.
U dalokim 2008 hodzie 18-hadovaja Marta, jašče salistka ansambla «Vierasy», trapiła na viadomaje fota z Łukašenkam.
Tak, heta jana viesieła tančyć (na zdymku sprava) pobač ź biełaruskim kiraŭnikom.
Paśla Hołubieva supravadžała Łukašenku na cyrymonii adkryćcia Vialikaha teatra. Była jana i na adkryćci Kupałaŭskaha teatra paśla rekanstrukcyi.
Jašče adna pryhažunia — Darja Kraŭčuk. Na fota jana źleva, u čornym.
Darja rodam ź Niaśviža, vučyłasia na fakultecie žurnalistyki BDU na śpiecyjalnaści «infarmacyja i kamunikacyja».
U 2017 hodzie padčas vučoby na druhim kursie Kraŭčuk udzielničała ŭ konkursie pryhažości «Mis Viasna», pieramožcy jakoha paśla niaredka supravadžajuć Łukašenku na mierapryjemstvach.
«Jašče da pastupleńnia na žurfak dziaŭčyna pasprabavała šmat chobi: hrała na skrypcy, jeździła z ansamblem vystupać za miažu, tančyła. U dziasiatym kłasie Daša zadumałasia pra pastupleńnie va ŭniviersitet. Pačała aktyŭna vyvučać hramadaznaŭstva i ŭ vyniku zaniała pieršaje miesca ŭ respublikanskaj alimpijadzie pa hetym pradmiecie. Paśla hetaha Daša bačyła dla siabie dva šlachi: ci iści na jurfak i zdavać jašče dva CT, ci pajści na infakam biez anijakich ekzamienaŭ», — pisali pra Darju napiaredadni konkursa.
Nastupnaja zborščyca kavunoŭ — Hanna Ivanova, uradženka Salihorska. Jana jašče studentka, vučycca ŭ BDU na fakultecie mižnarodnych adnosinaŭ.
Na fota Hanna ŭ centry, jana tolki što kinuła kavun.
Dziaŭčyna prymała ŭdzieł u adkryćci Jeŭrapiejskich hulniaŭ, była nie na trybunie, a na poli z udzielnikami. Voś, jana — «Bielhija».
Na nastupnym zdymku sprava Maryja Bahamałova.
Dziaŭčyna taksama ŭdzielničała ŭ cyrymonii adkryćcia Jeŭrapiejskich hulniaŭ. Ale była na trybunie, razam z supracoŭnicami słužby pratakoła.
Uvohule, padobna na toje, što na zbor uradžaju zaprasili jak prosta znajomych pryhažuniaŭ Łukašenki, tak i supracoŭnic słužby pratakoła. Apošnich možna było adroźnić pa makijažy i adnolkavych pryčoskach (Hołubieva i Sankovič, naprykład, pryjšli sa «zvyčajnymi» pryčoskami).
Da «Dnia narodnaha adzinstva» pamiłavali 25 čałaviek4
Kamientary