37-hadovy Alaksandr Kadłubaj staŭ namieśnikam ministra adukacyi. Zhodu na hetaje pryznačeńnie 29 lipienia daŭ Alaksandr Łukašenka.
Heta dastatkova niečakanaje kadravaje rašeńnie. Alaksandr Kadłubaj zajmaŭ dastatkova ścipłuju pasadu načalnika adździeła adukacyi Lidskaha rajvykankama.
Rodam Alaksandr z Karelickaha rajona Hrodzienskaj vobłaści. Chadziŭ u škołu ŭ vioscy Varonča. Heta dastatkova viadomyja miaściny — miascovyja piejzažy malavaŭ Napaleon Orda, tut byvali Adam Mickievič i Jan Čačot.
Baćka Alaksandra Uładzimir Albinavič Kadłubaj byŭ dyrektaram prafiesijna-techničnaha vučylišča ŭ miastečku Mir.
Vučylišča rychtuje stalaroŭ, rezčykaŭ pa drevie i restaŭrataraŭ.
U 2008 hodzie vučylišča stała kaledžam, to bok z PTV pieraŭtvaryłasia ŭ siarednie-śpiecyjalnuju ŭstanovu.
Alaksandr vučyŭsia ŭ BDU na histaryčnym fakultecie, tut ža sustreŭ žonku Alenu.
Na hety momant jana pracuje nastaŭnicaj historyi ŭ SŠ №8 u Lidzie. U pary dźvie dački-bliźniatki Viera i Luba, ciapier jany pierajšli ŭ dziaviaty kłas.
Adnakurśniki Alaksandra zhadvajuć, što jon byŭ kulturnym, dastatkova prychilnym da biełaruskaści, ale pry hetym i kanjunkturnym.
Na histfaku vučyłasia i siastra Alaksandra Aksana. Ciapier jana žyvie ŭ Maskvie, vyjšła zamuž za rasijanina.
Z čym moža być źviazany ŭźlot pravincyjnaha supracoŭnika sistemy adukacyi da ministerskich kresłaŭ? Sioleta vučań ź Lidy Ihnat Iljušonak uskryŭ «źlivy» zadańniaŭ na respublikanskaj alimpijadzie pa hieahrafii.
Hety vypadak detalova rasśledavała Ministerstva adukacyi i pryznała, što taki vypadak sapraŭdy byŭ. Mahčyma, jakraz paśla hetaha mahli źviarnuć uvahu na Kadłubaja.
Minadukacyi pra «źliŭ» alimpijadnych zadańniaŭ pa hieahrafii: zvolnieny adzin z raspracoŭščykaŭ
Cikavym źjaŭlajecca i samo proźvišča Kadłubaj. Jano maje tatarskaje pachodžańnie. Takoje proźvišča mieŭ šlachiecki rod, jaki vałodaŭ majontkam Jastrambiel u miežach sučasnaha Baranavickaha rajona. A ŭtvaryłasia jano ad dvuch karanioŭ «katły», što značyć «pryhožy», i «baj» — «bahaty pavažany čałaviek».
Ciapier čytajuć
Polski błohier naviedaŭ Biełaruś — niekatoryja jaho vysnovy vas ździviać14
Kamientary