Nikol Kidman raskazała, čamu pierajechała ŭ hłybinku, i pryznałasia, što nie kantaktuje z usynoŭlenymi dziećmi
Nikol Kidman, aktrysa, śpiavačka i pradziusarka, stała hierainiaj vokładki amierykanskaha časopisa Vanity Fair. Jaje intervju i fotasiesija źjaviacca ŭ majskim numary.
Dla fotasiesii stylisty vybrali čornuju sukienku Prada z błakitnymi kvietkami i ŭpryhažeńni ad Tiffany & Co.
Nikol Kidman raspaviała žurnalistam vydańnia, što addaje pieravahu žyćciu dalej ad Halivudu pa-za zdymačnaha pracesu. U jaje jość dom niedaloka ad Nešviła, stalicy štata Tenesi, dzie jana pravodzić čas razam z mužam Kitam Urbanam i dziećmi: dziesiacihadovaj Sandej Roŭz i vaśmihadovaj Fejt Marharet. Pad Nešvił aktrysa pierajechała trynaccać hadoŭ tamu, paśla taho jak vyjšła zamuž za muzykanta Kita Urbana. Tut zorcy praściej zastacca niezaŭvažnaj i vieści narmalnaje žyćcio.
Aktrysa raspaviała ab vychavańni dziaŭčynak: Kidman prytrymlivajecca strohich praviłaŭ, jana zabaraniaje im karystacca telefonam i zavodzić akaŭnty ŭ sacyjalnych sietkach. Dzieci ŭvieś čas čymści zaniatyja, zajmajucca muzykaj i zdymajuć videa. Adnak ni Kidman, ni jaje muž nie nastojvajuć na tym, kab dočki pajšli pa ich śladach.
— Nie dumaju, što dziaciej možna ŭ niešta siłkom ŭciahnuć. Možna tolki padšturchnuć, tamu što matyvacyja — sapraŭdy składanaja reč. Mianie nichto nie padšturchoŭvaŭ da taho, kab stać aktrysaj. Chutčej, naadvarot, utrymlivali ad hetaha.
Tym nie mienš Sandej i Fejt ŭžo paśpieli źniacca ŭ kino razam z mamaj. U červieni na ekrany vyjdzie druhi siezon papularnaha dramatyčnaha sieryjała «Vialikaja maleńkaja chłuśnia», źniaty pavodle ramana Lijany Maryjarci. Za rolu žančyny, jakaja pakutuje ad hvałtu z boku muža, Nikol Kidman atrymała premiju «Załaty hłobus» u naminacyi «Najlepšaja aktrysa mini-sieryjała ci televizijnaha filma». Dzieci i muž aktrysy źjaviacca ŭ adnym z epizodaŭ.
Taksama aktrysa raspaviała pra dziaciej, jakich jana ŭsynaviła padčas šlubu z Tomam Kruzam: jany ŭžo vyraśli i žyvuć samastojna — Konar zajmajecca muzykaj u Majami, a dačka Beła pierajechała ŭ Anhliju. Jany majuć mała znosin ź Nikol.
Taksama Kidman vykazałasia pra ŭzrost aktrysy ŭ sučasnaj industryi kino:
— Bolš u aktrys niama peŭnaha terminu «prydatnaści», jak heta było raniej. Treba ŭvieś čas raźvivacca, bo my navat žyviem daŭžej, čym raniej, kali nam pašancuje, viadoma. Tamu ja starajusia ŭžyvać svaju tvorčuju enierhiju i nie spyniacca.
Kamientary