Alaksandr Nieŭski — imia Rasii

Rasija vybrała hieroja, jaki procistajaŭ Zachadu.

Najvialikšym rasijaninam usich časoŭ i nacyjanalnym simvałam pavodle vynikaŭ interniet‑hałasavańnia, što doŭžyłasia paŭhodu, nazvany kniaź Alaksandr Nieŭski (1221—1263).

Prajekt «Imia Rośsija», zładzili telekanał «Rośsija», fond «Obŝiestviennoje mnienije» i Instytut rasijskaj historyi. Vyniki byli padviedzienyja ŭviečary ŭ niadzielu ŭ efiry prahramy «Viesti niedieli».

Alaksandr Nieŭski nabraŭ 529 575 hałasoŭ.

Druhoje i trecija miescy zaniali refarmatar, premjer-ministr Rasii ŭ 1906-1911 h., a ŭ 1902‑1903 h. haradzienski hubiernatar Piotra Stałypin (523 766 hałasoŭ), i Iosif Stalin (519 071 hołas).

Dalej histaryčnyja piersanažy raźmierkavalisia nastupnym čynam:

Puškin, Piotr I, Lenin, Dastajeŭski, Suvoraŭ, Miendzialejeŭ, Ivan Hrozny (u biełaruskaj tradycyi — Žachlivy), Kaciaryna II i Alaksandr II.

Techničnyja ŭmovy konkursu davali mahčymaść hałasavać adnamu čałavieku pa niekalki razoŭ.

***

Ekśpierty suprać Lenina i Stalina

Paralelna prachodziła hałasavańnie ekśpiertaŭ.

U im pieršaje i druhoje miescy padzialili Alaksandr Nieŭski i Puškin, trecim staŭ Suvoraŭ, čaćviertym — Stałypin. A voś Lenin i Stalin zaniali apošnija mieccy.

***

Śled u historyi biełaruskich ziemlaŭ

Alaksandr Jarasłavič (Nieŭski) — kniaź naŭharodski, a potym kijeŭski i ŭładzimirski. Viadomy, pieradusim, svaimi pieramohami nad šviedami ŭ 1240 h. na bierahach Niavy (za što i atrymaŭ hanarovuju mianušku), i nad teŭtonskimi rycarami ŭ 1242 h. (Ladovaje paboišča).

Darečy, jak śviedčać rasijskija historyki, Alaksandr Nieŭski paru razoŭ (1242, 1245) nadziravaŭ vušy tady jašče nie vialikamu, ale ŭžo litoŭskamu kniaziu Mindoŭhu i jahonym apałčencam.

A krychu raniej, u 1239 h.. jon uziaŭ šlub z dačkoj Bračysłava, kniazia Połackaha, Alaksandraj. Ad šlubu ź joj mieŭ čatyroch synoŭ i adnu dačku.

U masavaj śviadomaści źjaŭlajecca etałonam kniazia‑patryjota, abaroncy rodnaj ziamli. Kananizavany.

Staŭ vialikim kniaziem paśla našeścia Batyja, pravodziŭ palityku padparadkavańnia Załatoj Ardzie, žorstka dušyŭ paŭstańni suprać tatara‑manholskich zborščykaŭ daniny. Historyki i pa hety dzień spračajucca, ci byŭ hety kurs pamyłkovym, ci adzina mahčymym u tych varunkach.

***

Sprečny prajekt

Prajekt «Imia Rośsija» startavaŭ pry kancy traŭnia 2008 h.

Na pieršym etapie karystalniki Runieta pavinny byli vybrać na sajcie konkursu 50 histaryčnych asobaŭ z 500, papiarednie nazvanych navukoŭcami‑historykami, na druhim — vybrać z paŭsotni — pieršy tuzin, na trecim — i vyznačyć pieramožcu.

U lipieni razhareŭsia skandał, kali vyśvietliłasia, što ŭ apytańni ź vialikim adryvam lidziruje Stalin.

U žniŭni hałasavańnie było prypypiena, a ličylnik abnulili — arhanizatary zajavili, što za Stalina hałasavali šmatlikija spamiery.

Sajt rehularna padviarhaŭsia šmatlikim chakierskim atakam, što vyklikała ŭ mnohich sumnievy ŭ praŭdzivaści vynikaŭ.

uł. inf. i pavodle Bi-Bi-Si

• 0
• 0
• 0
• 0
• 0
• 0
• 0
• 0