Kali nie pamylajusia, hałoŭny načalnik upieršyniu zavualavana pasypaŭ hałavu popiełam u suviazi sa zmarnavanymi mahčymaściami zachodniaha viektara. Piša ŭ svaim błohu Alaksandr Kłaskoŭski.
18 śniežnia, razmaŭlajučy z kiraŭnikami dziaržaŭnych ŚMI, Alaksandr Łukašenka zajaviŭ, što "adnosiny ź ES treba vyraŭnoŭvać". Jon dadaŭ: u tym, što ŭ svoj čas nie zusim intensiŭna raźvivalisia adnosiny ź Jeŭropaj, vina jeŭrapiejcaŭ nie mienšaja za našu. Karaciej, fifci-fifci. Kali nie pamylajusia, heta pieršaje zavualavanaje pasypańnie hałavy popiełam u suviazi sa zmarnavanymi mahčymaściami zachodniaha viektara.
Uvohule namier vypravić "dziki kren na ŭschod" biełaruski aficyjny lider upieršyniu dekłaravaŭ — vy nie pavierycie! — jašče letam 1999 hoda. Ale tady heta było vyklučna strašyłkaj dla Maskvy, jakaja nie chacieła ŭstaloŭvać pasadu sajuznaha prezidenta. Praź niekalki miesiacaŭ, adnak, padpisali vialiki sajuzny dahavor, i prajekt "bratniaj intehracyi" ŭvajšoŭ u novuju fazu.
Siońnia my raspłačvajemsia za šmathadovuju ślapuju pryviazku da Rasii. Jaje rynak pad upłyvam kryzisu na vačach skurčvajecca, i našy "MAZy", traktary, nie havoračy ŭžo pra chaładzilniki i televizary, prosta niama kudy padzieć. Na zachodnich rynkach tym bolš ničoha nie śviecić.
A na pradukcyju suśvietnaha kłasa my, pa sutnaści, tak i nie vyjšli. Najspryjalniejšy čas, kali možna było adnosna biazbolna refarmavać ekanomiku, zładzić madernizacyju, na žal, zmarnavany. Zdavałasia, naftahazavaja "durnica" budzie viečnaj — dyk našto "daŭninu buryć"?
Ciapier voś davodzicca ŭ pažarnym paradku abviaščać libieralizacyju.
"Treba spynić biurakratyčny ździek nad ekanomikaj, — zajaviŭ kiraŭnik dziaržavy ŭ tym ža intervju dziaržaŭnym ŚMI. — Nie musić być zasilla biurakratyi ŭ hety pieryjad, kali vakoł šuhaje finansava-ekanamičny kryzis". Jon dadaŭ: "Nie musić być zališniaha administracyjnaha cisku na ekanomiku, nieabchodna libieralizavać usie hetyja pracesy i dać mahčymaść ludziam spakojna pracavać".
Viadoma, rytaryčnym źjaŭlajecca pytańnie: a mahli b škodnyja biurakraty dušyć ekanomiku ŭsie hetyja hady, kali b administracyjnaja madel nie vyznavałasia najvyšejšymi instancyjami?
Ale lepš pozna, čym nikoli. Lod kranajecca. Łukašenka paviedamiŭ, što padpisaŭ važnyja dakumienty adnosna libieralizacyi ekanomiki. Nieŭzabavie jany buduć apublikavany. Pabačym.
Inšaja reč, što kryzis, padšturchnuŭšy da źmiakčeńnia biźnies-klimatu ŭ Biełarusi, adnačasova zvužaje mahčymaści chutka atrymać vyjhryš na Zachadzie. Tamtejšyja bahatyry sami pieražyvajuć nie lepšyja časy. Dy i imidž niebiaśpiečnaj dla inviestaraŭ krainy tak chutka nie vypraviš.
Da taho ž Zachad choča i źmiakčeńnia palityčnaha klimatu ŭ krainie ź jarłykom "apošniaj dyktatury Jeŭropy". I voś tut sprava idzie asabliva tuha. U tym ža intervju Łukašenka zaznačyŭ, što rolu našaj dziaržavy ŭ śviecie dyktuje jaje hieahrafičnaje stanovišča ŭ centry Jeŭropy. "Adsiul našy pierśpiektyvy ŭ adnosinach z Zachadam. My znachodzimsia ŭ centry i tamu pavinny mieć narmalnyja adnosiny i ź Jeŭropaj, i z Rasijaj", — zaznačyŭ jon.
Jak bačym, upor — na hieahrafiju, u toj čas jak patrabavalnaja Jeŭropa ćvierdzić ab standartach u halinie demakratyi i pravoŭ čałavieka.
Ale voś tut Minsk vielmi zaścierahajecca nie pierabrać. Pakul my bačym tolki imitacyju adlihi: viarnuli ŭ kijoski dźvie haziety, zarehistravali ruch Milinkieviča… Pra sistemnyja kroki i havorki niama.
Pakazalnaja farmuloŭka, jakaja prahučała 18 śniežnia z vusnaŭ vice-premjera ŭrada Andreja Kabiakova na sustrečy ŭ Minsku z kiraŭnikom pradstaŭnictva Jeŭrakamisii va Ukrainie i Biełarusi Žaze Manuelem Pintu Tejšejra. "Biełaruski bok zacikaŭleny ŭ paŭnavartasnaj i prahmatyčnaj supracy ź ES z uporam na ekanamičny składnik", — padkreśliŭ vice-premjer.
Karaciej, Brusiel schilajuć da prahmatyzmu i "ekanamizmu". U zajavach dziaržaŭnych mužoŭ na jeŭrapiejskuju temu adzin i toj ža padtekst: adsunuć padalej "efiemiernyja materyi" typu demakratyi i pravoŭ čałavieka.
I padajecca, što Jeŭropa hatova krychu adyści ad pryncypaŭ. Jana raźličvaje na eroziju tutejšaj madeli — spačatku ekanamičnaj, a potym (kropla kamień točyć!) i palityčnaj. Chto kaho pierachitryć — pytańnie adkrytaje.
Pavodle słoŭ Kabiakova, "metazhodna padumać nad afarmleńniem adnosinaŭ i pačać raspracoŭku novaha pahadnieńnia ab partniorstvie i supracy pamiž Biełaruśsiu i ES".
Vo kali spachapilisia! Staroje pahadnieńnie było zamarožana adrazu paśla refierendumu-96, jaki šakavaŭ Zachad. A ŭsio ž tak dobra pačynałasia! I małady prezident Łukašenka ŭ Brusieli padpisvaŭ toj pieršy dakumient.
A potym nastupiŭ ledavikovy pieryjad daŭžynioj 12 hadoŭ. Poŭny cykł pa ŭschodnim kalendary. U płanie ž dačynieńniaŭ Biełarusi z supolnaściu demakratyj Staroha Śvietu hety cykł atrymaŭsia praktyčna chałasty.
Nie było b ščaścia, dy niaščaście dapamahło. Apietyty Rasii i finansavy kryzis vymusili šukać šlachi da zamireńnia z Zachadam. Praces chistki. Zastajecca tolki spadziavacca, kab tanny haz u 2009 hodzie (torh za jaho budzie na dniach) nie abyšoŭsia zanadta doraha ŭ płanie dyjałohu ź ES.
Urešcie, hałoŭny tormaz — u samoj sistemie ŭłady. Načalstva choča zrabić ź Biełarusi pryhožy most pamiž Rasijaj i Jeŭropaj. Ale tut dekaratyŭnym ramontam nie abyścisia. Kapitalna ž pierabudoŭvać krainu pad jeŭrastandart strašna. A paŭmosta pa-ŭschodniamu, paŭmosta pa-zachodniamu — tak naŭrad ci atrymajecca.
Kamientary