Naŭrocki ŭniasie ŭ siejm Polščy zakonaprajekt, jaki surjozna ŭskładnić atrymańnie hramadzianstva. Hetaja ideja raniej zahłuchła
Prezident Polščy źbirajecca znoŭ prapanavać zakonaprajekt, jaki moža zakranuć mnohich biełarusaŭ.
Prezident Polščy Karal Naŭrocki zajaviŭ, što źbirajecca ŭnieści ŭ siejm zakonaprajekt, jaki surjozna ŭskładniaje atrymańnie polskaha hramadzianstva.
Naŭrocki choča, kab hramadzianstva davali zamiežnikam, jakija žyvuć u Polščy pa pastajannym dazvole na žycharstva 10 hadoŭ, a nie 3 hady, jak zaraz.
«Polskaje hramadzianstva — heta nie prosta vialiki honar. Čałaviek, jaki atrymlivaje polskaje hramadzianstva, taksama ŭpłyvaje na budučyniu našaj nacyjanalnaj supolnaści nie tolki na hady, ale i na dziesiacihodździ, a mahčyma, i na pakaleńni», — cytuje Naŭrockaha TVN.
Jon nahadaŭ, što dazvoł na hramadzianstva — prerahatyva prezidenta.
«Tamu ja liču, što termin pradastaŭleńnia hramadzianstva pavinien być pavialičany z troch da dziesiaci hadoŭ, i takaja prapanova budzie ŭklučana ŭ zakonaprajekt», — dadaŭ Naŭrocki.
Nahadajem, roŭna z takoj ža idejaj u mai vystupili deputaty ad apazicyjnaj partyi «Prava i spraviadlivaść», jakaja na prezidenckich vybarach padtrymlivała jakraz Naŭrockaha. Ale taja ideja ŭ siejmie, dzie ŭ «PiS» niama bolšaści, zachłynułasia. Ekśpierty ŭ kamientaryjach da zakonaprajekta pisali, što jon budzie mieć niehatyŭny efiekt. A ŭrad rekamiendavaŭ jaho nie razhladać.
«Naša Niva» raspaviadała ab prablemach taho karotkaha zakonaprajekta. Sama prapanova padaŭžeńnia terminu znachodžańnia na pastajannym dazvole na žycharstva z 3 hadoŭ da 10 zychodzić ź niapravilnaj dumki, što zaraz 3 hadoŭ dla hramadzianstva dastatkova.
Na samaj spravie, pa ahulnym pravile, da pastajannaha dazvołu na žycharstva zamiežniku treba pražyć u Polščy 5 hadoŭ pa časovym. To bok zvyčajny šlach da hramadzianstva bieź ilhot pa polskamu pachodžańniu, statusu ŭciekača abo šlubu z polskim hramadzianinam, składaje minimum 8 hadoŭ, a nie 3 hady, jak śćviardžali deputaty ad «PiS» i zaraz kaža Naŭrocki. Atrymlivajecca, kali zakonaprajekt prymuć, standartny šlach da polskaha hramadzianstva moža składać 15 hadoŭ zamiest 8, jak ciapier.
U čym kankretna zaklučajecca ideja prezidenta Polščy, možna budzie daviedacca tolki paśla publikacyi jaho zakonaprajekta. Ale dakumient nie zmoža prajści biez padtrymki kirujučaj libieralnaj kaalicyi. Tamu los zakonaprajekta zaležyć ad pazicyi ŭrada Donalda Tuska. Jon na fonie antymihranckich nastrojaŭ u Polščy taksama zajaŭlaŭ, što źbirajecca ŭzmacnić patrabavańni dla atrymańnia hramadzianstva. Ale svaich umoŭ pakul nie nazyvaŭ.
U lubym vypadku novy zakonaprajekt moža ŭskładnić žyćcio mnohim biełarusam, jakija pierajechali ŭ Polšču, u tym liku ratujučysia ad palityčnaha pieraśledu. Asabliva ŭličvajučy prablemy z zamienaj biełaruskaha pašparta.
Kamientary