Arhanizataru kviesta ŭ polskim Kašalinie, dzie 4 studzienia ŭźnik pažar i zahinuli piać 15-hadovych dziaŭčat, Miłašu S. siońnia było pradjaŭlena abvinavačvańnie, pieradaje tvp.info.
Jaho padazrajuć u naŭmysnym stvareńni niebiaśpieki vybuchu i pažaru ŭ escape-room i pryčynieńni śmierci pa nieaściarožnaści, paviedamiŭ u niadzielu ŭviečary pres-sakratar Akruhovaj prakuratury ŭ Kašalinie Ryčard Hansiaroŭski (Ryszard Gąsiorowski).
28-hadovy Miłaš S. nie pryznaŭ siabie vinavatym.
«My zychodzim z taho, što padazravany byŭ čałaviekam, jaki faktyčna ažyćciaŭlaŭ dziejańni ŭ ramkach biznesu, zarehistravanaha na jaho bližejšuju svajačku, i jon byŭ čałaviekam, jaki rychtavaŭ abstalavańnie ŭ hetych pakojach-hałavałomkach. I nie źviarnuŭ uvahi na toje, što tam niama adpaviednaha aciapleńnia hetych abjektaŭ, i što tam niama, u pieršuju čarhu, šlachoŭ evakuacyi, jakija ŭ vypadku niebiaśpieki, dazvolili b ŭdzielnikam hetych zabaŭ pakidać pamiaškańnie», — paviedamiŭ pres-sakratar Akruhovaj prakuratury.
Advakaty Miłaša S. paviedamili, što ich klijent prynios hłybokija spačuvańni siemjam zahinułych i skazaŭ, što nikoli b nikomu takoha nie pažadaŭ.
«Naš klijent u rospačy ad taho, što zdaryłasia. Abvinavačańniaŭ jon nie pryznaŭ. Tłumačeńniaŭ nie davaŭ, pakolki jon nie ŭ stanie psichałahična vynieści taho ciažaru, jaki na jaho zvaliŭsia», — paviedamili paśla vychadu z budynku prakuratury advakaty.
Miłaš S. źjaŭlajecca unukam miascovaj žycharki, na jakuju była zarehistravanaja pradprymalnickaja dziejnaść pa arhanizacyi escape room ŭ Kašalinie pa vuł. Piłsudskaha 88. Pa pradjaŭlenym abvinavačańni jamu pahražaje da 8 hadoŭ pazbaŭleńnia voli.
Pres-sakratar paviedamiŭ taksama, što prakuratura čakała mahčymaści dapytać rabotnika escape-room, jaki z mocnymi apiokami trapiŭ u špital.
Tolki paśla taho jak z dazvołu lekara hety 25-hadovy mužčyna byŭ dapytany, prakuratura paličyła mahčymym pačać śledčyja dziejańni ŭ dačynieńni da Miłaša S.
Na pytańnie ab mahčymym pryciahnieńni da adkaznaści uładalnicy budynka i toj žančyny, jakaja arandavała pamiaškańnie dla viadzieńnia biznesu, pres-sakratar prakuratury adkazaŭ, što abmiarkoŭvać heta «zanadta rana». Jon adznačyŭ, što abiedźviuch žančyn prakuratura razhladaje ŭ jakaści śviedak.
Nahadajem, 4 studzienia piać 15-hadovych dziaŭčat prachodzili hulniavy kvest, śviatkujučy dzień naradžeńnia adnoj ź ich. Kab vybracca z zamknionaha pamiaškańnia (escape-room), treba było rašać zadačy. Kali ŭźnik pažar, dziaŭčaty prajšli tolki pałovu šlachu. Pryčyny ŭzharańnia pakul nieviadomyja, mahčyma, uzarvaŭsia hazavy bałon.
Kamientary