U kancy červienia AMAP uvarvaŭsia na śvinhier-viečarynu pad Minskam. Naviednikaŭ advieźli ŭ milicyju, paśla adpuścili. Spačatku adpuścili i arhanizatara, Viačasłava Kazanava, ale paźniej jaho iznoŭ uziali pad vartu.
Čytajcie: Śpiecnaz uvarvaŭsia na viečarynu śvinhieraŭ pad Minskam VIDEA
Spačatku śledčyja paviedamlali, što Kazanava padazrajuć u arhanizacyi zaniatkaŭ prastytucyjaj. Ale paźniej abvinavačvańnie źmianiłasia. 19 vieraśnia siłaviki paviedamili, što mužčynu, viadomaha taksama jak Słava Kazanova, vinavaciać u seksualnym hvałcie.
Čytajcie: Arhanizatara śvinhier-viečarynak iznoŭ zatrymali. Jaho padazrajuć jašče i ŭ seksualnym hvałcie
Šmat kaho ździviła takoje žorstkaje abychodžańnie z amataram svabodnaha seksu. Ale vyśvietliłasia, što Kazanaŭ byŭ asudžany za dva žorstkija złačynstvy. U abodvuch vypadkach jaho achviarami byli maładyja žančyny. Adnu ź ich jon zhvałtavaŭ. Druhuju — zabiŭ nažom.
Padrabiaznaści raspavioŭ sb.by Alaksandr Azarevič, padpałkoŭnik justycyi i były śledčy. Akazvajecca «sprava ab abharełych huzikach» — i jość historyja Viačasłava Kazanava.
U 2001 hodzie ŭ vioscy pad Vilejkaj zatrymali złačyncu. Małady chłopiec pryjšoŭ da znajomaha zabrać doŭh. Dźviery jamu adkryła siastra daŭžnika. Chłopiec syšoŭ, ale paśla viarnuŭsia i zalez u chatu praz akno. Tam jon zhvałciŭ dziaŭčynu na vačach jaje brata, zabraŭ upryhažeńni, hadzińniki, hrošy.
Złačyncu zatrymali ŭ toj ža dzień. Heta i byŭ Viačasłaŭ Kazanaŭ.
U toj viečar Viačasłaŭ byŭ pjany. Ale na dopycie raptam paviedamiŭ, što jon śviedka jašče adnaho złačynstva. I daŭ śledčym adras kvatery ŭ Vilejcy.
Tam milicyjanty znajšli cieła dziaŭčyny, z voka jakoj tyrčaŭ nož.
Trup lažaŭ u vańnie bolš za miesiac.
Śledčyja pačali vyśviatlać abstaviny zabojstva. Zatrymany Kazanaŭ raskazvaŭ, što zabitaja dziaŭčyna — jaho znajomaja. Maŭlaŭ, jon sustrakaŭsia ź joj. U adzin ź viečaroŭ dziaŭčyna paprasiła jaho syści. Chłopiec nibyta vyjšaŭ z kvatery, ale spaźniŭsia na apošni aŭtobus i vyrašyŭ viarnucca. A ŭ kvatery zaśpieŭ trup svajoj kachanki i jaje byłoha muža.
Muža zatrymali, ale stała zrazumieła, što jon nie zabivaŭ dziaŭčynu. Zatoje padčas ahladu pamiaškańnia, dzie žyŭ Kazanaŭ, u piečy znajšli abharełyja mietaličnyja huziki. Supastavili z apoviedam novaj kachanki zatrymanaha hvałtaŭnika-«śviedki»: žančyna kazała, što toj uvieś čas chadziŭ u skuranoj kurtcy. A paśla taja kudyści źnikła.
Śledčyja stali zdahadvacca, što mienavita chłopiec ździejśniŭ zabojstva. A paśla jon pryznaŭsia sam.
Na toj momant jon žyŭ z žančynaj.U ich było ahulnaje dzicia, ale heta nie pieraškadžała Viačasłavu mieć stasunki ź inšymi. Adna z takich dziaŭčat i stała achviaraj.
Kazanaŭ raskazaŭ, što načavaŭ u znajomaj. Jana razbudziła jaho i zaviała razmovu pra stasunki. Maŭlaŭ, patrabavała, kab jon ažaniŭsia ź joj i kinuŭ svaju sužycielku i dzicia. Pačałasia svarka, jakaja pierajšła ŭ bojku. Haspadynia kvatery nibyta schapiłasia za siakieru i ŭdaryła chłopca pa plačy. Toj schapiŭ nož, udaryŭ jaje i patrapiŭ u voka. Pierakonvaŭ, što vypadkova. Dziaŭčyna zahinuła adrazu ž.
Potym Kazanaŭ pieraciahnuŭ cieła ŭ vannu, nakryŭ chałatam i pajšoŭ. Na adsutnaść zahinułaj nie źviartali ŭvahi: susiedzi viedali, što jana pieryjadyčna jeździła na lačeńnie abo na pracu ŭ Minsk — mahła adsutničać da troch tydniaŭ.
A vopratku, jakaja była na im u toj viečar — u tym liku i kurtku — chłopiec spaliŭ doma ŭ piečy.
Sud pryznaŭ chłopca vinavatym i ŭ zhvałtavańni, i ŭ zabojstvie. Złačynca atrymaŭ 17 hadoŭ kałonii.
Vyzvaliŭsia Kazanaŭ raniej. U 2015 hodzie jon vyjšaŭ pa ŭmoŭna-daterminovym. Pierajechaŭ u Minsk, dzie peŭny čas namahaŭsia zajmacca biznesam. Išło nie vielmi.
Paralelna, jak kazaŭ sam Kazanaŭ, jon arhanizoŭvaŭ śvinhier-viečaryny. Ale, nastojvaŭ Viačasłaŭ, heta było chobi. Hrošaj na takich viečarynach jon nie zarablaŭ.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały3
Kamientary