Adam Hłobus navučyć padletkaŭ pisać kreatyŭna

Z kastryčnika 2018 hoda raspačynaje svaju pracu Škoła kreatyŭnaha piśma Adama Hłobusa «Litara» pry Biełaruskim PEN-centry. Škoła skiravanaja na padletkavuju aŭdytoryju.

U prahramie Škoły — aznajamleńnie, vyvučeńnie i praktykavańnie ŭ formach litaraturnych minijaciur (dziońnikavy zapis, choku, hrehieryja) na prykładzie kłasikaŭ suśvietnaj i biełaruskaj litaratury: Sej-Sionahon, Janki Bryla, Basio, Ramona Homesa de la Serny i inšych. 

Čytańnie i pisańnie tekstaŭ navučyć maładych ludziej bolš surjoznamu staŭleńniu da litaratury i tvorčaści ahułam, dapamoža lepiej zrazumieć siabie i ludziej naŭkoła, asensavana padychodzić da vybaru žyćciovych šlachoŭ.

Zaniatki ŭ Škole buduć adbyvacca ad pieršaj pałovy kastryčnika 2018 hoda da kanca traŭnia 2019 hoda ŭ Minsku. Pieryjadyčnaść: čatyry razy na miesiac pa vychodnych u pieršaj pałovie dnia. Ich praciahłaść składzie 2 akademičnyja hadziny (90 chv.). Raz na miesiac (zamiest kłasičnych zaniatkaŭ) navučency buduć udzielničać u litaraturnych imprezach i festach, naviedvać muziei i vystavy, vandravać pa litaraturnych miaścinach našaj stalicy.

Navučańnie ŭ Škole biaspłatnaje. 

Płanujecca, što hrupa składzie kala 20 čałaviek. Pracoŭnymi movami na zaniatkach buduć biełaruskaja i ruskaja.

Da navučańnia ŭ Škole zaprašajem dziaŭčat i chłopcaŭ ad 15 da 18 hadoŭ uklučna. Svaje zajaŭki prosim dasyłać na elektronnuju skryniu: [email protected] da 30 vieraśnia 2018 hoda. 

U zajaŭcy nieabchodna:

1) napisać krychu pra siabie i svaich baćkoŭ — nie zabudźcie paznačyć taksama svaje hod i miesca naradžeńnia, svaje kantakty (elektronny adras, mabilny telefon, staronka ŭ sac.sietkach); 

2) pradstavić 1 ci 2 aŭtarskija teksty nievialikaha abjomu (apaviadańnie, ese, vierš, sačynieńnie); 

3) adkazać na pytańnie, čaho vy čakajecie ad zaniatkaŭ u Škole.

Paśla 30 vieraśnia maładyja ludzi razam sa svaimi baćkami buduć zaprošanyja na sumoŭje, pa vynikach jakoha i adbudziecca adbor u Škołu.

Pra vykładčyka

Adam Hłobus — biełaruski piśmieńnik, mastak, vydaviec. Naradziŭsia ŭ 1958 hodzie. Skončyŭ piedahahičnaje adździaleńnie Minskaha mastackaha vučylišča (1977), Biełaruski dziaržaŭny teatralna-mastacki ŭniviersitet (1983). Doŭhi čas vykładaŭ u Biełaruskim kalehijumie. Jak piśmieńnik pracuje ŭ halinie paezii i prozy. U druku pačaŭ vystupać ź vieršami ŭ 1981 hodzie. Aŭtar amal dvaccaci knih prozy, paezii i publicystyki. Jaho vieršy i apaviadańni pierakładzienyja na asnoŭnyja movy śvietu. Siabra Sajuza biełaruskich piśmieńnikaŭ i Biełaruskaha PEN-centra.

• 0
• 0
• 0
• 0
• 0
• 0
• 0
• 0