Karupcyjanier-prakuror Archipaŭ znajšoŭ novaje miesca pracy
Bolš za dva hady pamiłavany Alaksandr Archipaŭ kiravaŭ kałhasam «Piatrovičy», a 1 červienia syšoŭ z pracy, napisaŭšy zajavu ab zvalnieńni. Jak daviedaŭsia TUT.BY, były namieśnik hienprakurora niadoŭha byŭ biez spravy — niadaŭna jon staŭ pieršym namieśnikam hienieralnaha dyrektara kampanii BiełAsieptyka.
— Ja pracuju pieršym namieśnikam hienieralnaha dyrektara. Pracuju niadaŭna, — prakamientavaŭ TUT.BY Alaksandr Archipaŭ, kali my datelefanavalisia ŭ kampaniju BiełAsieptyka.
1 červienia były namieśnik hienprakurora syšoŭ z kałhasa «Piatrovičy» Smalavickaha rajona, jakim kiravaŭ bolš za dva hady. U intervju «Narodnaj voli» svoj sychod jon prakamientavaŭ tak: «Mnie prosta skazali, što ja svabodny, voś i ŭsio. (…) Rastalisia pa pahadnieńni bakoŭ».
Tady ž jašče zajaviŭ, što budzie šukać novuju pracu, bo «niama załatoha zapasu, kab lažać na piečy». I znajšoŭ.
Jak skazana na aficyjnym sajcie BiełAsieptyki, kampanija vyrablaje šyroki śpiektr prafiesijnych antysieptykaŭ, dezinfikujučych, myjnych srodkaŭ — dla arhanizacyj achovy zdaroŭja, adukacyi, pradpryjemstvaŭ charčovaj pramysłovaści, kamunalnaj śfiery, sielskaj haspadarki i mnohich inšych abłaściej žyćciadziejnaści čałavieka.
Nahadajem, kryminalnaja sprava ŭ dačynieńni da byłoha namieśnika hienprakurora raspačali, kali jon dapamoh zamiać kryminalnuju spravu ŭ dačynieńni da syna biznesmena. Pjany małady čałaviek biez pravoŭ jechaŭ na matacykle, nie spraviŭsia z kiravańniem, u vyniku čaho zahinuła 24-hadovaja dziaŭčyna. Sud nad Archipavym prachodziŭ u zakrytym režymie, padrabiaznaści spravy žurnalisty tak i nie daviedalisia. Pra spravu samoha Archipava stała viadoma, kali pra jaho raspavioŭ kiraŭnik krainy. Vajskovaja kalehija Viarchoŭnaha suda pryznała Alaksandra Archipava vinavatym u atrymańni chabaru, pieravyšeńni słužbovych paŭnamoctvaŭ i prysudziła da šaści hadoŭ pazbaŭleńnia voli. Prysud abskardžańniu nie padlahaŭ, ale praz paŭtara hoda Alaksandr Michajłavič vyjšaŭ na volu - jon byŭ pamiłavany.
Kamientary