Jay-Z z Beyonce, Florence + The Machine i nie tolki. 10 muzyčnych albomaŭ červienia, jakija vy mahli prapuścić
Červień vydaŭsia pa-letniamu ŭradlivym na novyja albomy. Pahladzim, što cikavaha vyrasła na muzyčnaj hlebie. Jak zaŭsiody — dziasiatka najbolš zaŭvažnych navinak minułaha miesiaca vašaj uvazie!
Morcheeba — Blaze Away
Pijaniery tryp-chopu viarnulisia praź piać hod. U novym albomie muzyki admovilisia ad ekśpierymientaŭ i prykłali maksimum namahańniaŭ, kab stvaryć kłasičny «marčybaŭski» huk.
Kanye West — Ye
Kańje — adnaznačna samy pracavity artyst hetaha leta. U červieni vyjšła piać albomaŭ, da jakich jon maje dačynieńnie. Pieršym byŭ reliz Pusha T, potym solnik, astatnija — duet z Kid Cudi, płytki Nas dy Teyana Taylor.
Repier zładziŭ vielmi aryhinalnuju prezientacyju alboma: na ranča ŭ štacie Vajominh. Paklikaŭ tudy žurnalistaŭ, muzykaŭ i zorak. Praŭda, tamtejšyja haspadary nie acanili źmienlivy nastroj Kańje Uesta, a taksama vielmi hučnuju muzyku.
Mike Shinoda — Post Traumatic
Majk nijak nie moža pieražyć śmierć svajho blizkaha siabra Čestera Beninhtana. Mienavita hetaj psichałahičnaj traŭmie i pryśviečany albom.
Šynoda raskazvaje, nakolki ciažka było muzykam Linkin Park sabracca i adyhrać kancerty pamiaci svajho lidara. I nakolki ciažka im čytać vykazvańni pra chajp na śmierci Beninhtana.
Florence + The Machine — High As Hope
Fłorens Uełč viarnułasia praz try hady maŭčańnia, i heta tryumfalna. Jak pryznałasia rudavałosaja brytanka, novyja pieśni dazvolili joj uziać pad kantrol svaje škodnyja zvyčki i psichałahičnyja prablemy.
Iduć hady, mianiajecca moda, ale vytančanaść Fło i jaje muzyčnaj mašyny zaŭsiody pa-nad pieramienami.
DDT — Hala chadzi
Dvaccaty albom lehiendarnaha kalektyvu. Juryj Šaŭčuk chacieŭ zrabić tak, kab kožnaja pieśnia adroźnivałasia ad usich inšych. Heta płytka ekśpierymientaŭ i šyrokaha dyjapazonu tem — ad vajny da kachańnia.
Drake — Scorpion
Novy albom kanadskaha repiera za pieršyja sutki prasłuchali bolš za 300 miljonaŭ razoŭ — heta absalutny rekord.
Siarod 25 trekaŭ jość adzin vielmi niezvyčajny — Don't Matter To Me, dzie z Drejkam śpiavaje … Majkł Džeksan. Karol pop-muzyki pamior u 2009 hodzie, ale praz 9 hod jahonyja niavydadzienyja zapisy 1983 hoda atrymali novaje žyćcio.
Bullet For My Valentine — Gravity
BFMV šostym albomam stali ŭ šerah trendavych mietał-kalektyvaŭ z elektronnymi prymočkami. Hučyć modnieńka, ale heta ŭžo nie toj hurt, jakim vy zachaplalisia ŭ školnyja hady.
Gorillaz — The Now Now
Hod tamu prychilniki tvorčaści Gorillaz u štyki sustreli albom Humanz, dzie za zaprošanymi artystami nie było čuvać Dejmana Ałbarna. The Now Now — albom z Ałbaram na pieršym płanie, toj albom, dzie jon «prosta śpiavaje».
The Carters — Everything Is Love
Siamiejny padrad Jay-Z i Beyonce. Pra płany zapisać sumiesny albom para ŭpieršyniu raspaviała ŭ minułym hodzie, ale zaniacca zapisam zmahli tolki paśla vychadu solnikaŭ.
Everything Is Love licha startanuŭ u muzyčnych čartach. Ci supadzie vaša mierkavańnie ź mierkavańniem zamiežnych słuchačoŭ?!
SAJUZ — Heta ŭsio zusim nie toje
Paśla dvuch miesiacaŭ cišyni ŭ našych padborkach znoŭ znajšłosia miesca dla ajčynnaj muzyki.
Minskaje indzi-trya vydała debiutnuju płytku na ŭkrainskim łejble Ivana Dorna. Jak kažuć muzyki, albom pra budzionnaje žyćcio liryčnaha hieroja, jaki hublajecca ŭ šerahu adnolkavych dzion.
A što vy słuchali ŭ červieni? Pišycie ŭ kamientarach!
Ciapier čytajuć
Łukašenka vykazaŭsia pra deficyt miedykaŭ i prapanavaŭ im pracavać bolš3
Kamientary