Biełaruskamoŭnaha inžyniera rodam z Chojnikaŭ asudzili — chutčej za ŭsio, pa spravie Hajuna
Alaksandr Povad stvaraŭ prahramy dla radyjacyjnaha manitorynhu i pracavaŭ u minskim «Atamtechu». Niadaŭna chłopca asudzili pa palityčnym kryminalnym artykule.
Alaksandru Povadu 29 hadoŭ. Jon rodam z Chojnikaŭ Homielskaj vobłaści. U 2016 hodzie chłopiec skončyŭ Minski dziaržaŭny enierhietyčny kaledž, a paśla pastupiŭ u Mižnarodny dziaržaŭny ekałahičny instytut imia Sacharava BDU, dzie ŭ 2021 hodzie atrymaŭ dypłom miedycynskaha fizika. U dypłomnaj pracy chłopiec raspracavaŭ ałharytm dla vymiareńnia aktyŭnaści šmatkampanientnych radyjonuklidnych krynic dla «Atamtecha».
Na «Atamtech» ža Alaksandr i ŭładkavaŭsia pracavać inžynieram dazimietryčnaha adździeła i prahramistam. Chłopiec pisaŭ kod na Python, C/C++, C# i JavaScript, stvaraŭ krospłatformiennyja dadatki na Qt i raspracoŭvaŭ veb-sistemy ŭliku radyjenuklidaŭ. Jon taksama vykarystoŭvaŭ mašynnaje navučańnie dla analizu radyjacyjnych danych i pracavaŭ z prahramami dla madelavańnia vypramieńvańnia. Z reziume Alaksandra vyhladaje, što jon śpiecyjalist vysokaha ŭzroŭniu na sutyku IT i jadziernaj fiziki.
U sacsietkach Alaksandr čaściej za ŭsio kamientavaŭ niešta pa-biełarusku — pra kino, movy, miemy. U volny čas jon rabiŭ uniosak u prajekty z adkrytym zychodnym kodam na Github.
Minski haradski sud niadaŭna vynies jamu prysud pavodle častak 1 i 2 artykuła 361‑4 KK (sadziejničańnie ekstremisckaj dziejnaści). Što kankretna stała nahodaj dla pieraśledu — dakładna nieviadoma, ale chutčej za ŭsio heta sprava Hajuna.
Alaksandru Povadu prysudzili chatniuju chimiju.
***
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
Sprava Hajuna pačałasia paśla taho, jak siłaviki zatrymali aktyvistku Palinu Zyl, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta.
«Naša Niva» — bastyjon biełaruščyny
PADTRYMAĆ
Aryštavali pradstaŭnikoŭ kampanii Bayer u Biełarusi15
Kamientary